عورتوں کے بیچ میں بولنے والا مرد نہیں ہوتا۔۔ فضاء علی نے یاسر نواز کو کڑا جواب دیتے ہوئے کیا کچھ بول دیا؟

Fiza Ali Hits Back At Yasir Nawaz

اداکار یاسر نواز کے اہلیہ ندا یاسر کے دفاع میں دیے گئے بیان کے بعد شوبز حلقوں میں ایک نیا تنازع کھڑا ہو گیا ہے، جس پر اداکارہ فضا علی نے کھل کر اور دوٹوک انداز میں ردِعمل دے دیا۔ اس تازہ بیان کے بعد سوشل میڈیا پر بحث مزید تیز ہو گئی ہے اور معاملہ ایک بار پھر خبروں کی سرخیوں میں آ گیا ہے۔

یاد رہے کہ ندا یاسر حال ہی میں فوڈ ڈیلیوری رائیڈرز سے متعلق اپنے ایک تبصرے پر عوامی تنقید کی زد میں آ گئی تھیں، جس پر انہوں نے بعد ازاں وضاحت کے ساتھ معذرت بھی کی۔ اس بحث میں فضا علی نے واضح مؤقف اختیار کرتے ہوئے کہا تھا کہ فوڈ ڈیلیوری سے وابستہ افراد نہایت محنتی ہوتے ہیں اور انہیں تھوڑی سی ٹِپ دینا کسی کے لیے مشکل نہیں، اس لیے ان پر منفی الزامات عائد کرنا مناسب نہیں۔

فضا علی کے اس مؤقف پر یاسر نواز نے ردِعمل دیتے ہوئے کہا تھا کہ وہ بلاوجہ ندا یاسر کو تنقید کا نشانہ بنا رہی ہیں۔ تاہم اب فضا علی نے اس بیان کا سخت جواب دیتے ہوئے کہا ہے کہ ایک باوقار اور سمجھدار مرد کبھی کسی عورت پر لفظی حملہ نہیں کرتا۔ ان کے مطابق یہ اختلاف دو خواتین کے درمیان تھا، اس میں کسی مرد کی مداخلت غیر ضروری اور نامناسب ہے۔

فضا علی نے مزید کہا کہ وہ فارغ بیٹھ کر تنازعات نہیں اچھالتیں بلکہ اپنے کام پر توجہ دیتی ہیں اور اپنے پلیٹ فارم کے ذریعے معاشرے کے حقیقی مسائل پر بات کرتی ہیں۔ اس معاملے پر سوشل میڈیا صارفین دو حصوں میں بٹ گئے ہیں، جہاں کچھ لوگ فضا علی کے مؤقف کو درست قرار دے رہے ہیں، وہیں دوسرے صارفین یاسر نواز کو ایک ذمہ دار شوہر کہہ رہے ہیں جو اپنی اہلیہ کے حق میں کھڑے ہوئے۔