سالگرہ منا رہی تھی اور ۔۔ 17 سالہ ٹک ٹاکر ثنا یوسف کو گھر میں گھس کر کس نے مارا؟ آخری ویڈیو وائرل

17 Year Old TikTok Star Sana Yousaf Shot Dead In Islamabad

اسلام آباد کے علاقے جی-13 میں 2 جون کی رات ایک افسوسناک واقعے نے سوشل میڈیا صارفین کو ہلا کر رکھ دیا، جب 17 سالہ باصلاحیت انفلوئنسر ثنا یوسف کو ایک نامعلوم شخص نے ان کے گھر میں فائرنگ کر کے قتل کر دیا۔ یہ واقعہ رات 9 بجے کے قریب پیش آیا، اور ثنا موقع پر ہی دم توڑ گئیں۔

ثنا یوسف نہ صرف اپنی دلکش شخصیت کی وجہ سے مشہور تھیں بلکہ ان کا شمار ان نوجوان انفلوئنسرز میں ہوتا تھا جنہوں نے قلیل وقت میں لاکھوں دل جیت لیے۔ انسٹاگرام پر ان کے پانچ لاکھ سے زائد جبکہ ٹک ٹاک پر آٹھ لاکھ فالوورز تھے۔

افسوسناک بات یہ ہے کہ اپنی سالگرہ کے دن ہی انہوں نے اپنی خوشی کے لمحات ایک ویڈیو کے ذریعے مداحوں کے ساتھ شیئر کیے — اور چند گھنٹوں بعد ایک قیامت خیز خبر نے سب کو افسردہ کر دیا۔

ذرائع کے مطابق حملہ آور گھر میں داخل ہوا اور ثنا کو نشانہ بنایا۔ والدین انہیں فوری طور پر اسپتال لے گئے مگر وہ جانبر نہ ہو سکیں۔ لاش کو پوسٹ مارٹم کے لیے پمز اسپتال منتقل کیا گیا، جہاں طبی معائنے کے بعد تدفین کے انتظامات کیے جا رہے ہیں۔ نمازِ جنازہ سے قبل غسل کی رسومات ایچ 8 قبرستان میں ادا کی جائیں گی، جس کے بعد ثنا کا جسدِ خاکی ان کے آبائی علاقے اپر چترال منتقل کیا جائے گا۔

ثنا یوسف کا تعلق چترال سے تھا، لیکن وہ اپنے والدین کے ساتھ اسلام آباد میں مقیم تھیں۔ ان کی خوبصورتی اور معصومیت نے مداحوں کو اداکارہ ہانیہ عامر کی یاد دلائی، اور ان کا ہر ویڈیو سوشل میڈیا پر وائرل ہو جاتا تھا۔

ان کی ناگہانی موت پر پورا سوشل میڈیا غم میں ڈوبا ہوا ہے۔ ایک صارف نے لکھا، وہ اپنی سالگرہ کے دن دنیا سے چلی گئی... دل دہل گیا! دوسرے نے کہا، الوداع ثنا، تمہاری مسکراہٹ کبھی نہیں بھولیں گے۔ ایک اور مداح نے لکھا ویڈیوز میں وہ کتنی خوش لگ رہی تھی، دل ٹوٹ گیا۔ اللہ جنت نصیب کرے۔

یہ واقعہ نہ صرف ثنا یوسف کے چاہنے والوں کے لیے بلکہ پورے معاشرے کے لیے ایک لمحہ فکریہ ہے، جہاں بڑھتے ہوئے جرائم اور سیکیورٹی کے مسائل نے عوام کو خوف میں مبتلا کر دیا ہے۔

ثنا یوسف – خوابوں کی شہزادی، جو ہمیشہ کے لیے خاموش ہو گئی۔