میڈیا نے تو زندہ کو مردہ بنا دیا۔۔ دھرمیندر کی حالت اب کیسی ہے؟ ڈاکٹرز کا صحت سے متعلق بیان

Dharmendra Health Update Discharge From Hospital

بالی ووڈ کے سینئر ترین اور مقبول اداکار دھرمیندر کی صحت سے متعلق تازہ ترین خبر سامنے آئی ہے — انہیں ممبئی کے بریچ کینڈی اسپتال سے ڈسچارج کر دیا گیا ہے اور اب وہ گھر پر آرام کر رہے ہیں۔

بھارتی میڈیا کے مطابق، 89 سالہ لیجنڈری اداکار کو بدھ کی صبح اسپتال سے رخصت کیا گیا، جبکہ ان کا علاج اب اہل خانہ کی نگرانی میں گھر پر ہی جاری رہے گا۔ صبح کے وقت اسپتال سے ایک ایمبولینس کو دھرمیندر کے گھر جاتے ہوئے دیکھا گیا، جس کے بعد ان کے معالج نے تصدیق کی کہ دھرمیندر جی کو صبح تقریباً ساڑھے سات بجے اسپتال سے ڈسچارج کر دیا گیا ہے۔

ڈاکٹر کے مطابق خاندان کی خواہش ہے کہ وہ باقی علاج گھر کے پرسکون ماحول میں مکمل کریں۔ بعدازاں اہلِ خانہ کی جانب سے بھی بیان جاری کیا گیا کہ دھرمیندر بہتر محسوس کر رہے ہیں، گھر پر زیرِ علاج ہیں، اور ہم تمام چاہنے والوں سے درخواست کرتے ہیں کہ کسی قسم کی افواہوں پر یقین نہ کریں۔

گزشتہ چند روز سے ان کی طبیعت بگڑنے کی خبریں سامنے آ رہی تھیں اور 10 نومبر کو انہیں وینٹی لیٹر پر رکھا گیا تھا۔ خوش آئند بات یہ ہے کہ اب ان کی حالت میں نمایاں بہتری آئی ہے۔

یاد رہے، کچھ میڈیا پلیٹ فارمز نے گزشتہ روز ان کے انتقال کی جھوٹی خبریں پھیلائیں جن کی تردید خود ان کی اہلیہ ہیما مالنی اور بیٹی ایشا دیول نے کی تھی۔ دونوں نے مداحوں سے دعا کرنے اور افواہوں سے گریز کی اپیل کی تھی۔

اداکار کے مداحوں نے ان کی صحتیابی کی خبر سن کر سکون کا سانس لیا ہے اور سوشل میڈیا پر دھرمیندر کے لیے نیک تمناؤں اور دعاؤں کا سلسلہ جاری ہے۔