بچوں کو دیسی انڈا کھلائیں یا سفید؟ ماہرین نے تحقیق کر کے ماؤں کی مشکل آسان کردی! دیکھیں

ناشتے میں انڈوں کا استعمال ہر گھر میں صحت بخش غذا کے طور پر کیا جاتا ہے۔ اکثر خواتین بچوں کے لئے دیسی انڈے یہ سوچ کر خریدتی ہیں کہ دیسی انڈے صحت کے لئے زیادہ فائدہ ہیں۔ لیکن کیا یہ خیال درست ہے؟ یا حقیقت کچھ اور ہے؟

بات اگر دیسی انڈوں کی کی جائے تو عام تاثر یہ ہے کہ انھیں زیادہ صحت مند اور وٹامن سے بھرپور سمجھا جاتا ہے، جس کی بڑی وجہ قیمت کا زیادہ ہونا ہے۔ لیکن ماہرین کی رائے میں یہ خیال درست ہر گز درست نہیں۔ ماہرین کا کہنا ہے کہ انڈے کی رنگت مرغی کی نسل کی وجہ سے مختلف ہوتی ہے۔ سفید اور فارمی مرغی کے انڈے سفید جبکہ گہرے اور دیسی رنگ کی مرغیوں کے انڈے بھورے یا سرخی مائل ہوتے ہیں۔

انڈے کے چھلکے کا رنگ مرغی کی بچہ دانی میں موجود غدود کی وجہ سے بھورا یا سرخی مائل ہوسکتا ہے جو پورا انڈہ بن جانے کے بعد خارج ہوتا ہے۔ یہ روغن سفید انڈوں کے چھلکوں میں نہیں پایا جاتا۔ اس حوالے سے ماہر غذائیت سید تسنیم حسنین چوہدری اور پولٹری ماہر شکیلہ فاروق کا کہنا ہے کہ اگرچہ سرخ انڈوں میں اومیگا تھری فیٹی ایسڈز زیادہ ہوتے ہیں لیکن غذائیت کے اعتبار سے سفید اور دیسی انڈے ایک جیسے ہوتے ہیں۔ اتنا ہی نہیں بلکہ نیویارک میں کی جانے والی تحقیق سے بھی یہ بات ثابت ہوتی ہے کہ دیسی اور فارمی مرغیوں کے انڈوں کی غذائیت برابر ہے۔

اگرچہ انڈے کے چھلکوں کی رنگت کا غذائیت پر فرق نہیں پڑتا لیکن ماہرین کے مطابق انڈے کی زردی کا رنگ جتنا زیادہ گہرا ہوگا اس میں وٹامن اے، کیروٹین، معدنیات اور ذائقہ بھی اتنا ہی زیادہ ہوگا۔ دیسی مرغیوں کی زردی، فارمی انڈوں کے مقابلے میں زیادہ گہرے رنگ کی ہوتی ہے۔ ماہرین اس کی وجہ مرغی کی بہتر خوراک کو قرار دیتے ہیں۔ اس سے ثابت ہوتا ہے کہ انڈوں کی غذائیت بڑھانے کے لئے دیسی انڈے خریدنے سے زیادہ اس بات پر غور کرنے کی ضرورت ہے کہ انڈا دینے والی مرغی کی خوراک کیا ہے۔ اگر فارمی مرغی کو بھی اچھی خوراک دی جائے تو سفید انڈا بھی بھرپور صحت بخش ہوسکتا ہے۔