نانی تشدد کرتی ہیں خالہ باتھ روم صاف کرواتی ہیں.. رات کہاں گزاری؟ لاپتہ ہونے والے بچوں کے دکھ بھرے حقائق نے سب کو ہلا کر رکھ دیا

"نانی تشدد کرتی تھیں. خالہ برتن اور واش روم صاف کراتی تھیں. نازیبا زبان استعمال کی جاتی تھی۔ اس لئے ہم خود گھر چھوڑ کر گئے تھے"

یہ کہنا ہے گزشتہ روز کراچی سے لاپتہ ہونے والے ایان اور انابیہ کا جنھوں نے نجی چینل سے گفتگو کرتے ہوئے حالات سے تنگ آ کر خود گھر چھوڑنے کا انکشاف کیا.

انابیہ اور ایان کا کہنا ہے کہ ایک انکل آنٹی کے ساتھ ان کے گھر رات گزاری. بچوں نے اپنی کہانی ان کو سنائی تو وہ اپنے ساتھ گھر لے گئے تھے.

واضح رہے کہ گزشتہ رات سے سوشل میڈیا پر نارتھ ناظم آباد سے لاپتہ ہونے والے بہن بھائی ایان اور انابیہ کے لاپتہ ہونے کی خبریں سرگرم تھیں جس کے بعد ان کی والدہ کا ویڈیو بیان بھی سامنے آیا جس میں انھوں نے روتے ہوئے لوگوں سے مدد کی اپیل کی.

دونوں بچے کراچی کے علاقے نارتھ ناظم آباد بلاک ایچ سے کم عمر بہن بھائی 12 سالہ ایان اور 11 سالہ انابیہ لاپتہ ہوگئے تھے، ماموں نے بتایا تھا ایان اور انابیہ رات گیارہ بجکر پچاس منٹ پر برگر لینے گھر سے نکلے تھے.

تفصیلات کے مطابق ایان اور انابیہ کے والدین میں 8 سال قبل علیحدگی ہوچکی اور والدہ دبئی میں ملازمت کرتی ہیں جبکہ بچے ماموں کے ساتھ رہتے ہیں. بچوں کی بازیابی کے بعد والد کا کہنا ہے کہ وہ بچوں کی حوالگی چاہتے ہیں انھیں بچوں سے 5 یا 10 منٹ سے زیادہ نہیں ملنے دیا جاتا تھا۔