خریدنے سے پہلے اصلی اور کیمیکل والے آم کا پتہ کیسے لگائیں؟ آسان طریقہ جو آپ کے گھر والوں کو زہریلے آم سے محفوظ رکھے

Asli Or Nakli Mango Ki Pehchan

آم کا موسم آتے ہی فضا میں ایک خاص سی مٹھاس گھل جاتی ہے۔ ہر طرف رنگ برنگے آم اور ان کی خوشبو ہی خوشبو۔ لیکن جیسے جیسے یہ مزیدار پھل دسترخوان کی زینت بنتا ہے، ویسے ویسے ایک تشویش بھی ساتھ آتی ہے، کیا یہ آم واقعی درخت پر پکا ہوا ہے یا کسی کیمیکل لیب کی پیداوار ہے؟

مشہور ہیلتھ کوچ لوک کوٹینو نے اس مسئلے کا نہایت آسان اور گھریلو حل بتایا ہے، جو ہر کسی کو آزمانا چاہیے۔

ان کے مطابق آم خود کوئی خطرہ نہیں، لیکن اگر وہ کاربائیڈ جیسے خطرناک کیمیکل کی مدد سے پکایا گیا ہو، تو یہی ذائقہ موت کا پیغام بھی بن سکتا ہے۔

قدرتی اور کیمیکل سے پکے آم میں فرق کیسے کریں؟

رنگ پر نظر رکھیں:

قدرتی آم کا رنگ ایک جیسا نہیں ہوتا۔ کبھی کہیں ہلکا پیلا، کہیں ذرا سا سبز یا کچھ بھورے سے دھبے – یہ سب درخت پر دھیرے دھیرے پکنے کی نشانیاں ہیں۔ اگر آم بالکل یکساں چمکدار پیلا ہو، جیسے کسی نے پولش کر دی ہو، تو ہوشیار ہو جائیں۔

نرم ہے یا "اوور" نرم؟

قدرتی آم ہاتھ میں بھرے بھرے محسوس ہوتے ہیں، تھوڑے سے نرم لیکن مضبوط۔ مگر کیمیکل سے پکے آم اکثر یا تو بے حد نرم ہوتے ہیں یا دبانے پر اندر سے بیٹھ جاتے ہیں – یہ اس بات کا اشارہ ہے کہ آم کو زبردستی پکایا گیا ہے۔

پانی کا جادوئی ٹیسٹ:

یہ سب سے دلچسپ اور آسان تجربہ ہے۔ بس ایک برتن میں پانی بھریں اور آم کو اندر ڈالیں۔ اگر آم ڈوب جائے، تو مبارک ہو! یہ قدرتی طریقے سے پکا ہے۔ اور اگر تیرنے لگے، تو سوچیں! شاید اس میں گودا کم اور ہوا زیادہ ہو – جو کیمیکل کی کارستانی ہو سکتی ہے۔

لوک کوٹینو واضح کرتے ہیں کہ یہ تجربہ لیب رپورٹ نہیں، لیکن ایک سمجھدار خریدار کے لیے کافی ہے۔ جب سبزی یا پھل خریدتے وقت ہم تازگی پر دھیان دیتے ہیں، تو آم جیسا خاص پھل بھلا کیوں چھوڑیں؟

یاد رکھیں، آم سے نہیں، آم کے مصنوعی پکنے کے طریقے سے ڈریں۔ جب بازار جائیں تو آم کی رنگت، ساخت اور وزن پر غور کریں۔ چند لمحوں کی یہ توجہ آپ کے پیاروں کو نقصان دہ کیمیکل سے بچا سکتی ہے اور ذائقے کے ساتھ صحت کا مزہ بھی دے سکتی ہے.