آم کھا کر دودھ کیوں پینا چاہیے۔۔ جانیں ایسا کرنے سے کون سی تکلیفوں سے بچا جاسکتا ہے؟

آپ نے اکثر سنا ہوگا کہ آم کھانے کے بعد دودھ ضرور پینا چاہیے۔ لیکن بچے تو بچے بلکہ بڑے بھی دودھ پینے سے بھاگتے ہیں۔ آج کے آرٹیکل میں ہم آپ کو آم کھا کر دودھ پینے کے چند فائدے بتائیں گے۔

آم صرف ذائقے میں ہی شاندار نہیں ہوتے۔ یہ بے شمار غذائی اجزاء کا ذخیرہ ہیں جو گرمی کے موسم میں قوت مدافعت کو بڑھاتے ہیں اور ذیابیطس سے لے کر دل کی بیماریوں تک بہت سی بیماریوں سے بچانے میں مدد دیتے ہیں۔ یہ قدرتی طور پر آپ کے ہاضمے کی صحت کو بھی بہتر کرتے ہیں۔ بھارت سے تعلق رکھنے والی ڈاکٹر ڈکسا بھوسر نے آم کے فائدے بتاتے ہوئے کہا کہ آم فائبر، بیٹا کیروٹین اور پوٹاشیم کا ایک بڑا ذریعہ ہیں جو بلڈ پریشر کو کم کرنے میں کارگر ہے۔

ڈاکٹر ڈکسا کا کہنا ہے کہ کھانے سے تقریباً آدھا گھنٹہ پہلے آموں کو پانی میں ضرور بھگوئیں۔ آم کو بھگونے سے آم میں موجود اضافی فائٹک ایسڈ کو دور کرنے میں مدد ملتی ہے اس طرح غذائی اجزاء کو بہتر طور پر جذب کرنے میں مدد ملتی ہے۔

آم کو دودھ کے ساتھ کھانے کے فائدے

ڈاکٹر ڈکسا کا کہنا ہے کہ آم کا ملک شیک بنا کر پینا جسم کو سکون بخشتا ہے۔ یہ ایک قوت بخش ٹانک ہے اس کے علاوہ آم کھا کر دودھ پینے سے پھل کی گرم تاثیر ٹھنڈی ہونے لگتی ہے۔ دانے نہیں نکلتے، خون بنتا ہے اور رنگت صاف ہوتی ہے۔