شبیر غصے کے تیز ہیں تو میں چپ ہوجاتی۔۔ کامیاب شادی کے مشورے دینے پر فریدہ شبیر تنقید کی زد میں کیوں آگئیں؟

Shabbir Jan Wife Farida Shabbir Advice For Successful Marriage Sparks Debate

پاکستانی ڈرامہ انڈسٹری کی سینئر اداکارہ فریدہ شبیر، جنہوں نے اداکاری کے ساتھ ساتھ ازدواجی زندگی کے سفر میں بھی کئی اتار چڑھاؤ دیکھے، حال ہی میں سما ٹی وی کے ایک شو میں جلوہ گر ہوئیں۔ شوبز کے جانے مانے اداکار شبیر جان کی اہلیہ ہونے کے ناتے ان کی زندگی کی کہانی صرف اسکرین تک محدود نہیں، بلکہ پسِ پردہ بھی کئی سبق چھپے ہیں۔

فریدہ نے کھل کر بتایا کہ ایک کامیاب رشتہ صرف محبت سے نہیں، بلکہ سمجھ بوجھ اور قربانیوں سے پنپتا ہے۔ ان کا کہنا تھا کہ جب دونوں فریق ضدی ہوں تو رشتہ نبھانا مشکل ہو جاتا ہے۔ میں جانتی تھی کہ شوبز کی دنیا کیسی ہے، اسی لیے بہت سی باتوں کو نظر انداز کیا۔ جب وہ غصے میں ہوتے، میں خاموشی اختیار کر لیتی۔ لیکن خاموشی ہمیشہ حل نہیں ہوتی۔ جب میرے بچے بڑے ہوئے، میں نے بولنا شروع کیا۔

ان کی یہ صاف گوئی سوشل میڈیا پر بحث کا باعث بن گئی۔ کچھ صارفین نے کہا، "یہ رشتہ نہیں، صرف ایڈجسٹمنٹ ہے!" جبکہ دوسرے لوگوں نے اس کی تائید کرتے ہوئے لکھا، "فریدہ بالکل ٹھیک کہہ رہی ہیں، ہمارا رشتہ بھی ایسے ہی چل رہا ہے۔"

فریدہ شبیر کے تجربات نے ایک بار پھر اس سوال کو زندہ کر دیا ہے، کیا خاموشی ہی رشتے بچانے کا واحد راستہ ہے یا یہ صرف وقتی بچاؤ ہے؟