شکرقندی پر لیموں نچوڑ کر کھانے سے کیا ہوتا ہے؟ شکرقندی اور لیموں کو ایک ساتھ ملا کر کھانے کے زبردست فائدے

سردی کے موسم کی ایک لذیذ سوغات شکر قندیاں بھی ہوتی ہیں جنھیں بچے، بوڑھے سمیت سب ہی شوق سے کھاتے ہیں۔ شکر قندی بنانا بھی بہت آسان ہے۔ صرف ابال کر نمک، چاٹ مصالحہ اور لیموں نچوڑ کر کھانے سے اس کا لطف دوبالا ہوجاتا ہے۔ آج کے اس آرٹیکل میں آپ کو شکر قندی پر لیموں ڈال کر کھانے اور شکر قندی کی غذائی اہمیت کے بارے میں بتایا جائے گا۔

شکر قندی کی غذائی اہمیت

شکرقندی میں فائبر اور اینٹی آکسیڈینٹس بھاری مقدار میں پائے جاتے ہیں۔ یہ صرف معدے کے لئے نہیں بلکہ دماغ کے لئے بھی فائدہ مند ہوتی ہے۔ شکرقندی میں موجود بیٹا کیروٹین، وٹامن اے کو قوت مدافعت اور بصارت تیز کرنے میں مدد فراہم کرتا ہے۔ شکرقندی میں وٹامن سی، وٹامن بی 6، آئرن، میگنیشیم، پوٹاشیم، گڈ کاربز اور پروٹین پایا جاتا ہے۔

شکرقندی میں لیموں ڈال کر کھانے کا فائدہ

لیموں نچوڑنے سے ابلی ہوئی شکرقندی کا ذائقہ تو دوبالا ہوتا ہی ہے لیکن لیموں اس کے فائدوں کو بھی دگنا کردیتا ہے۔ لیموں کے عرق میں شامل اینٹی آکسیڈینٹس شکرقندی کے ساتھ مل کر زہریلے مادوں کا خراج تیز کردیتے ہیں۔ لیموں ترش ہوتا ہے جس کی وجہ سے شکرقندی کی مٹھاس جسم میں توازن خراب نہیں کرتی اس کے علاوہ لیموں بھاری پن کم کرتا ہے اور کھانا جلدی ہضم کرنے میں مددگار ہوتا ہے۔

شکرقندی کے بے شمار فائدے

شکرقندی میں موجود وٹامن بی 6 دل کی بہت سی بیماریوں کی وجہ بننے والے ہوموسیٹین کا لیول کم کرتا ہے، شریانوں کو لچکدار بناتا ہے اور آنکھوں کی روشنی کے لئے بہت مفید ہے۔ شکرقندی میں پایا جانے والا وٹامن اے کینسر سے بچاؤ میں مدد گار ہے کیوں کہ اس میں کیروٹینائیڈ پایا جاتا ہے جو پھیپھڑوں کے کینسر کا خطرہ 33 فیصد تک کم کردیتا ہے۔

شکرقندی اندرونی صحت کے ساتھ حسن میں اضافے کا سبب بھی ہے۔ مختلف وٹامنز جلد کو چمکدار بناتے ہیں۔ خون کی روانی بہتر ہوتی ہے جس سے رنگت نکھر اٹھتی ہے۔ معدے کو صاف کرتا ہے اور السر کا خطرہ کم کرتا ہے۔