لوگ یہ چیز دن میں لگاتے ہیں لیکن میں۔۔ ربیکا خان خوبصورت نظر آنے کے لئے سونے سے پہلے کیا چیز لگاتی ہیں؟

"مجھے میک اپ کرنے کا بہت شوق ہے، اور میرے فینز اکثر پوچھتے ہیں کہ میں کون سی پراڈکٹس استعمال کرتی ہوں۔ آج میں اپنے اس راز سے پردہ اٹھا رہی ہوں۔ میں روزانہ سونے سے پہلے یا میک اپ اتارنے کے بعد سن بلاک ضرور لگاتی ہوں، یہی میری خوبصورتی کا راز ہے!" ربیکا خان نے اے آر وائی ڈیجیٹل کے مارننگ شو گڈ مارننگ پاکستان میں اپنی خوبصورتی کا راز بتاتے ہوئے کہا۔

ربیکا خان، جو معروف کامیڈین کاشف خان کی بیٹی اور مشہور ٹک ٹاکر و یوٹیوبر ہیں، نے اپنی جاذبیت کے پیچھے چھپے سادہ لیکن مؤثر راز کو دنیا کے سامنے پیش کیا۔ مارننگ شو کی میزبان ندا یاسر نے ان کی گوری، چمکدار جلد اور دلکش شخصیت کے بارے میں سوال کیا، جس پر ربیکا نے اپنے بیوٹی روٹین کے سب سے اہم حصے کا انکشاف کیا۔

سن بلاک: خوبصورتی کا اصل محافظ

ربیکا نے بتایا کہ وہ میک اپ ہٹانے کے بعد اپنی جلد کی حفاظت کے لیے سن بلاک لگاتی ہیں۔ ان کے مطابق، یہ عادت نہ صرف جلد کو سورج کی نقصان دہ شعاعوں سے محفوظ رکھتی ہے بلکہ جلد کی تازگی اور چمک کو بھی برقرار رکھتی ہے۔

ماہرینِ جلد بھی اس بات کی تصدیق کرتے ہیں کہ سن بلاک کا استعمال جلد کو جھلسنے، قبل از وقت بڑھاپے اور نقصان دہ اثرات سے بچانے میں نہایت اہم کردار ادا کرتا ہے۔

ربیکا کا کہنا تھا، "میں اپنے فینز کے لیے اپنی خوبصورتی کے تمام راز شیئر کرتی ہوں تاکہ وہ بھی اپنی جلد کی بہتر دیکھ بھال کر سکیں۔" ان کا سن بلاک استعمال کرنے کا مشورہ خاص طور پر ان خواتین کے لیے ہے جو جلد کی حفاظت کو اولین ترجیح دیتی ہیں۔

ربیکا خان کی یہ عادت ثابت کرتی ہے کہ گلیمر اور خوبصورتی کے پیچھے مہنگی مصنوعات یا غیر ضروری عادات کے بجائے سادہ اور مؤثر روٹین چھپی ہوتی ہے۔ سن بلاک کے ساتھ جلد کی مناسب دیکھ بھال آپ کو قدرتی چمک اور دلکشی فراہم کر سکتی ہے۔

کیا رات کے وقت سن بلاک استعمال کرنا چاہئیے؟

واضح رہے کہ سن بلاک درحقیقت دن کے وقت سورج کی تیز شعاؤں سے جلد کی حفاظت کرتا ہے۔ رات کے وقت چونکہ سورج کی روشنی نہیں ہوتی اس لئے اس کے استعمال کا کوئی فائدہ نہیں۔ البتہ سن اسکرین میں دیگر سیرم یا جلد کی نشونما کے لئے مختلف وٹامنز وغیرہ شامل کیے جاتے ہیں جس کی وجہ سے کچھ لوگ اسے رات میں استعمال کرنا پسند کرتے ہیں۔ جلد کی خوبصورتی کے لئے سیرم یا موئسچرائزر الگ سے بھی استعمال کیے جاسکتے ہیں۔