بیوی سے کہا تھا چاند توڑ کر لاؤں گا اس لئے.. بیوی کو چاند پر پلاٹ کا تحفہ کتنے میں دیا؟ دلچسپ کہانی

شادی سے پہلے تو سب ہی مرد بیویوں کے لیے چاند ستارے توڑنے کے وعدے کرتے ہیں مگر بعد میں حقیقتوں سے پالا پڑتے ہی سارے دعوے دھرے کے دھرے رہ جاتے ہیں۔ البتہ مغربی بنگال سے تعلق رکھنے والے سنجے نے اپنی بیوی سے کیا وعدہ سچ کر دکھایا۔ وہ تارے توڑ کر تو نہیں لائے لیکن بیگم کے لئے چاند پر پلاٹ ضرور خرید لیا ہے۔

بیوی کو خوش کرنے کے لیے اس کی سالگرہ پر دنیا بھر کے شوہر مختلف قسم کے سرپرائز اور تحائف دیتے ہیں لیکن حال ہی میں بھارت میں شوہر نے بیوی کو ایک ایسا تحفہ دیا جس نے اہلیہ کو حیران کر دیا۔

بھارتی میڈیا کا کہنا ہے کہ سنجے کی شادی اسی سال ہوئی ہے اار بیوی کی پہلی سالگرہ آتے ہی سنجے نے انھیں یادگار ترین تحفہ دیا۔ لوگ بیویوں کو پلاٹ کا تحفہ دیتے ہیں تو سنجے نے بیگم کو چاند پر پلاٹ کا تحفہ دیا۔

اس بارے میں سنجے نے بتایا کہ میں نے شادی سے پہلے مذاق میں ہی اپنی ہونے والی بیوی سے وعدہ کیا تھا کہ میں اس کے لیے چاند لے کر آؤں گا البتہ یہ تو ممکن نہیں تھا اس لیے میں نے سالگرہ پر اسے چاند پر پلاٹ تحفے میں دینے کا فیصلہ کیا۔

سنجے کا کہنا تھا کہ اپنے دوست کی مدد سے انھوں نے لونا سوسائٹی انٹرنیشنل کے ذریعے چاند پر ایک ایکڑ کا پلاٹ 10 ہزار روپے میں خریدا۔ اس سارے عمل کو مکمل ہونے میں تقریباً ایک سال لگا۔

قارئین کو یہ بتاتے چلیں کہ چاند پر پلاٹ لینا عملی طور پر ممکن نہیں ہے، لیکن کئی ویب سائٹس چاند کے ٹکڑے بیچتی ہیں اور اسے خریدنے والے افراد کو 'اعزازی سرٹیفکیٹ' دیتی ہیں۔