ہاتھ پکڑ کر دنیا کو بتائیں کہ میں ان کی بہن ہوں۔۔ عمران اشرف نے بہن ہونے کا دعویٰ کرنے والی عورت کو کیا کرارا جواب دیا؟

پاکستانی انڈسٹری کے معروف اداکار اور میزبان عمران اشرف پر ان کی مبینہ بہن شازیہ اشرف اعوان کے حالیہ بیانات نے سوشل میڈیا پر ہلچل مچا دی ہے۔ شازیہ کا دعویٰ ہے کہ وہ عمران اشرف کی حقیقی بہن ہیں، لیکن اداکار نے نہ صرف ان الزامات کی سختی سے تردید کی ہے بلکہ واضح کیا ہے کہ ان کا شازیہ سے کوئی تعلق نہیں۔

شازیہ اشرف اعوان نے میڈیا پر آکر عمران اشرف پر الزام لگایا کہ وہ اپنے سگے بہن بھائیوں کو تسلیم کرنے سے گریزاں ہیں۔ ان کے بقول، عمران اشرف کو اپنے بہن بھائیوں کے رشتے کا احترام کرتے ہوئے ان کا ساتھ دینا چاہیے۔ شازیہ نے مزید دعویٰ کیا کہ ان کے ایک بھائی علی عباس کے انتقال کے بعد وہ عمران کو بڑی دعاؤں کے بعد ملی تھیں، لیکن شہرت پانے کے بعد عمران نے مبینہ طور پر ان سے کنارہ کشی اختیار کر لی۔

شازیہ نے مزید کہا کہ وہ عمران اشرف کو ایک محنتی انسان مانتی ہیں، جو ماؤں اور بہنوں کی دعاؤں کے صدقے کامیاب ہوئے ہیں۔ لیکن، ان کے بقول، رشتوں کو نظرانداز کرنا کسی بھی کامیابی کی قیمت نہیں ہو سکتی۔ انہوں نے دعویٰ کیا کہ عمران شاید ان سے اس وجہ سے ملنے سے گریز کرتے ہیں کیونکہ وہ طلاق یافتہ ہیں اور کسی ممکنہ تنازعے سے بچنا چاہتے ہیں۔

جب اس معاملے پر ایکسپریس نیوز نے عمران اشرف سے رابطہ کیا، تو انہوں نے شازیہ کے تمام دعووں کو مسترد کرتے ہوئے ان الزامات کی سختی سے تردید کی۔ ان کا کہنا تھا کہ ان کے بیانات کا حقیقت سے کوئی تعلق نہیں، اور ان کی زندگی میں شازیہ اشرف نامی کوئی خاتون شامل نہیں۔

یاد رہے کہ عمران اشرف پاکستان کے چند بہترین فنکاروں میں شمار کیے جاتے ہیں، جو اپنی ورسٹائل اداکاری کے لیے جانے جاتے ہیں۔ ان کے مشہور ڈراموں میں ’رانجھا رانجھا کردی‘، ’دل لگی‘، ’الف اللہ اور انسان‘، اور ’رقصِ بسمل‘ شامل ہیں۔ آج کل وہ ایک نجی چینل کے کامیڈی شو ’مذاق رات‘ کی میزبانی کر رہے ہیں اور اپنی منفرد صلاحیتوں سے مداحوں کے دل جیت رہے ہیں۔

یہ تنازعہ جہاں عمران اشرف کے مداحوں کو حیرت میں ڈال رہا ہے، وہیں یہ سوال بھی اٹھاتا ہے کہ کیا یہ معاملہ حقیقت ہے یا محض میڈیا کی توجہ حاصل کرنے کی کوشش؟ وقت ہی بتائے گا کہ سچائی کہاں چھپی ہے۔