موت کے بعد اگلی زندگی میں بھی آپ کی خدمت کروں۔۔ عابد علی کی برسی پر دوسری بیوی رابعہ نے کیا جذباتی پیغام دیا؟

Rabia Abid Ali Shares Emotional Message For Late Abid Ali

پاکستان کی سینئر اور باصلاحیت اداکارہ رابعہ عابد علی، جو پی ٹی وی کے سنہری دور سے لیکر آج تک اپنی جاندار اداکاری سے ناظرین کو محظوظ کرتی رہی ہیں، ایک بار پھر مداحوں کے دلوں کو چھو گئی ہیں۔

ان کی شادی عظیم اداکار عابد علی سے ہوئی تھی، جو خود بھی ایک لیجنڈ کی حیثیت رکھتے تھے۔ یہ دونوں کی دوسری شادی تھی، جبکہ عابد علی کی پہلی بیوی حمیرا علی اور ان کی تین بیٹیاں بھی تھیں۔

چند برس قبل عابد علی دنیا چھوڑ گئے اور ان کی جدائی نے دونوں خاندانوں کو گہرے دکھ میں مبتلا کر دیا۔ اب ان کی برسی پر رابعہ عابد علی نے انسٹاگرام پر ایک دل کو رلا دینے والا پیغام شیئر کیا۔

انہوں نے لکھا، ایک اور سال بیت گیا لیکن تمہاری یادیں وہیں کی وہیں ہیں۔ تمہاری جدائی نے میری زندگی کا نقشہ بدل دیا ہے۔ تم صرف میرے شوہر نہیں، میری زندگی، میرا سہارا اور میرا سب کچھ تھے۔ میں ہر دن اس لمحے کی منتظر ہوں جب تمہیں دوبارہ دیکھ سکوں اور دعا کرتی ہوں کہ وہاں بھی تمہارے ساتھ رہنا نصیب ہو۔

رابعہ کے اس درد بھرے کلمات نے مداحوں کی آنکھیں نم کر دیں۔ ان کی محبت، وفا اور یادوں کی شدت نے ایک بار پھر یہ ثابت کر دیا کہ حقیقی رشتے وقت اور دنیا کی حدوں سے بھی بلند ہوتے ہیں۔