بھائی کی معذوری نے مجھے ذمہ دار بنا دیا ۔۔ ہمایوں سعید کی زندگی میں بھائی کے حادثے کے بعد کیا مشکلات آئیں؟ پہلی بار بتا دیا

پاکستانی شوبز اسٹار اداکار ہمایوں سعید نے حال ہی میں ایک پروگرام میں انکشاف کیا ہے کہ اُنہیں بھائی کی معذوری نے ایک ذمہ دار انسان بنادیا۔

ہمایوں سعید نے ایک نجی ٹی وی کے شو میں بطور مہمان خصوصی شرکت کی جہاں اُنہوں نے اپنے چھوٹے بھائی کے معذور ہونے کے بعد پیش آنے والی مشکلات کا تذکرہ کیا۔

اُنہوں نے بتایا کہ بچپن سے ہی میری یہ عادت رہی ہے کہ میں جو بھی کام ہو اسے پورے دل سے کرتا تھا اور بہت چھوٹی عمر سے ہی میں نے ایک کمپنی میں کام کرنا شروع کر دیا تھا تو وہاں بھی میں نے بہت محنت سے کام کیا۔

اداکار نے مزید بتایا کہ میں نے شروعات ہی سے بہت محنت کی ہے اور پورے لگن کے ساتھ کام کر کے اپنے گھر کے حالات بہتر بنائے کیونکہ میں سب سے بڑا بھائی ہوں اور میرا چھوٹا بھائی بابر ایک حادثے میں معذور ہوگیا تھا، بھائی کی معذوری کے بعد مجھ پر ذمہ داریاں بڑھ گئیں۔

ہمایوں سعید نے بتایا کہ میں اپنے بھائی کی معذوری کے بعد زیادہ ذمہ دار انسان بنا، اسی لیے مجھے اب کام کرنے کی عادت ہے اور اب مجھے ہر کام آسان لگتا ہے۔

اُنہوں نے کہا کہ جو لوگ اکثر مجھ سے یہ کہتے ہیں کہ میرے مزاج میں بہت عاجزی ہے، وہ بھی چھوٹی عمر میں کی ہوئی محنت کی وجہ سے ہے۔