ربڑ جیسے چہرے ہوگئے ہیں۔۔ توقیر ناصر نے اداکاراؤں کی فیشل سرجریوں کو نشانہ بناتے ہوئے کیا کچھ سنا دیا؟

Tauqeer Nasir On Pakistani Actress Facial Surgeries

سینئر اداکار توقیر ناصر نے حالیہ گفتگو میں شوبز کی موجودہ روش پر ایسا کڑوا سچ بولا ہے جس پر شاید بہت سوں کو اعتراض ہو، لیکن غور کریں تو بات دل کو چھو جاتی ہے۔ معروف یوٹیوب چینل سنو ٹی وی پر بات کرتے ہوئے انہوں نے نہ صرف موجودہ اداکاراؤں کی خوبصورتی کی تعریف کے بدلتے معیار کو نشانہ بنایا، بلکہ پورے ڈرامہ کلچر پر سوالیہ نشان لگا دیا۔

توقیر ناصر نے کہا، آج کی اداکارائیں خوبصورتی کے جنون میں چہروں کو ربڑ جیسا بنا رہی ہیں — تاثرات ختم، جذبات ناپید۔

ان کے مطابق، پلاسٹک سرجری اور فلرز نے چہروں کو اتنا بے جان کر دیا ہے کہ ان میں اداکاری کی اصل جان — احساس اور تاثرات — باقی نہیں رہتی۔

انہوں نے ماضی کی لیجنڈز کا ذکر کرتے ہوئے کہا کہ شمیم آرا، زیبا اور دیگر کلاسیکی اداکاراؤں میں وہ قدرتی حسن، وقار اور نسوانی سادگی تھی جسے کوئی میک اپ یا سرجری پیدا نہیں کر سکتی۔

پہلے اگر کوئی بیوٹی ٹریٹمنٹ کرتی بھی تھی، تو ایک فیشل تک محدود رہتی تھی، آج تو سب کچھ ری ڈیزائن ہو چکا ہے۔

اداکاری یا بس ایک خوبصورت فریم؟

صرف ظاہری خوبصورتی ہی نہیں، توقیر ناصر کو آج کی ڈرامہ انڈسٹری کی گہرائی بھی کھوکھلی محسوس ہوتی ہے۔

انہوں نے تنقید کرتے ہوئے کہا، اب ہر منظر فیشن شو لگتا ہے — چاہے اداکارہ کچن میں ہو یا بستر پر، فاؤنڈیشن، لپ اسٹک اور جھمکے ساتھ ہوں گے۔

ہدایتکار یا صرف ویڈیو ڈائریکٹر؟

توقیر ناصر نے ڈائریکشن کے معیار پر بھی انگلی اٹھائی، پہلے ہدایتکار اداکار کے ساتھ سانس لیتا تھا، اسے کردار میں اترنے میں مدد دیتا تھا۔ آج صرف مانیٹر کے پیچھے بیٹھ کر سین اوکے کرنے والا شخص 'ڈائریکٹر' بن جاتا ہے۔

ان کی یہ گفتگو صرف ایک تبصرہ نہیں، بلکہ ایک آئینہ ہے جو ہمیں یہ دکھاتا ہے کہ ہم شاید اصل فن اور کردار کی گہرائی کو کھو بیٹھے ہیں — اور بدلے میں صرف چمکتی اسکرینز، فیشن اور وائرل کلپس کو ترجیح دے رہے ہیں۔