ماں بھی میرے موٹاپے سے تنگ تھیں۔۔ پہلی فلم کے لئے 30 کلو وزن کم کرنا پڑا! سوناکشی سنہا نے کم وقت میں موٹاپا کم کرنے کا کیا طریقہ بتایا؟

"میں بچپن سے ہی موٹی تھی۔ بچپن میں میرا وزن 95 کلو تھا جس کی وجہ سے اسکول میں بچے مذاق اڑاتے تھے۔ کوئی ساتھ کھلاتا نہیں تھا، اسکول میں کوئی شو ہو تو کوئی کردار مجھے نہیں دیا جاتا تھا۔ اسکول تو اسکول گھر میں ماں بھی میرے موٹاپے سے تنگ تھیں۔ وہ بار بار وزن کم کرنے اور کم کھانے کا کہتی تھیں"

یہ کہنا ہے بھارت کی مشہور اداکارہ سوناکشی سنہا کا جنہوں بے دہائی پہلے دبنگ فلم سے دبنگ انٹری دے کر اپنی اداکاری کا لوہا تو منوا لیا لیکن اس فلم کو حاصل کرنے کے لئے بھی ان کو وزن زیادہ ہونے کی وجہ سے بہت پریشانی کا سامنا کرنا پڑا۔

احساس ہوا کہ وزن کم کرنا کیوں ضروری ہے

سوناکشی کہتی ہیں کہ سلمان خان کے ساتھ پہلی فلم کرنے کے لئے انھوں نے 30 کلو وزن گھٹایا۔ اگرچہ انھیں ہمیشہ سے موٹاپا کم کرنے کی تلقین کی جاتی تھی لیکن یہ بات سن سن کر وہ باغی ہوگئیں تھیں۔ بڑے ہونے کے بعد انھیں احساس ہوا کہ وزن کم کرنا ان کی ضرورت ہے تا کہ وہ صحت مند زندگی گزار سکیں۔

جلد وزن کم کرنے کے لئے

سوناکشی کا کہنا ہے کہ وہ 2 گھنٹے ورزش لازمی کرتی ہیں اس کے علاوہ کھانا وہ صرف گھر کا کھاتی ہیں۔ پھلوں اور سبزیوں کا استعمال زیادہ کرتی ہیں اور جلد وزن کم کرنے کے لئے وہ زیادہ پانی پیتی ہیں تاکہ پیٹ بھرا رہے اور بھوک کم لگے.