میں اسے کبھی معاف نہیں کروں گی۔۔ دھرمیندر کی بگڑتی طبیعت پر ہیما مالنی کا بیان! ایشا دیول نے والد کی صحت سے متعلق کیا بتایا؟

Hema Malini And Esha Deol Angry On Indian Media For Spreading Fake News About Dharmendra Death

بھارتی میڈیا میں ایک ہلچل مچ گئی جب یہ خبر گردش کرنے لگی کہ بالی ووڈ کے سینئر ترین اداکار دھرمیندر 89 برس کی عمر میں انتقال کر گئے ہیں۔ اس خبر نے شائقینِ فن کو افسردہ کر دیا، مگر سچائی کچھ اور ہی نکلی۔

میڈیا رپورٹس کے مطابق دھرمیندر کو ممبئی کے بریچ کینڈی اسپتال میں سانس لینے میں دشواری کے باعث داخل کرایا گیا تھا، جہاں انہیں وینٹی لیٹر پر رکھا گیا۔ بتایا جا رہا ہے کہ گزشتہ ہفتے بھی انہیں ایسی ہی تکلیف کے باعث اسپتال منتقل کیا گیا تھا، جب کہ اس سال اپریل میں ان کی آنکھ کا آپریشن بھی ہوا تھا۔

اسی دوران یہ افواہیں جنگل کی آگ کی طرح پھیل گئیں کہ اداکار اب اس دنیا میں نہیں رہے، مگر دھرمیندر کی بیٹی ایشا دیول نے سوشل میڈیا پر آ کر ساری حقیقت واضح کر دی۔

انہوں نے انسٹاگرام پر پیغام جاری کرتے ہوئے کہا کہ، "بھارتی میڈیا جھوٹ اور بے بنیاد خبریں پھیلا رہا ہے، ان کے والد خیریت سے ہیں اور علاج جاری ہے۔ ایشا نے مداحوں سے اپیل کی کہ وہ افواہوں پر یقین نہ کریں اور ان کے والد کی جلد صحت یابی کے لیے دعا کریں۔"

ساتھ ہی ہیما مالنی نے بھی اس تمام صورتحال سے دل گرفتہ نظر آئیں۔ انہوں نے میڈیا کے رویہ پر سخت تنقید کرتے ہوئے لکھا؛

"جو کچھ ہو رہا ہے وہ ناقابلِ معافی ہے! آخر ذمہ دار میڈیا ادارے کیسے کسی ایسے شخص کے بارے میں جھوٹی خبریں پھیلا سکتے ہیں جو علاج کا مثبت جواب دے رہا ہے اور صحتیاب ہو رہا ہے؟ یہ رویہ انتہائی بے ادبی اور غیر ذمہ دارانہ ہے۔ براہِ کرم خاندان کا احترام کریں اور ان کی پرائیویسی کا خیال رکھا جائے۔"

یاد رہے کہ دھرمیندر نے اپنی آنے والی فلم 'اکیس' میں آخری بار اداکاری کے جوہر دکھائے ہیں، جو رواں سال 25 دسمبر کو ریلیز ہونے والی ہے — اور شائقین اس فلم میں اپنے پسندیدہ اداکار کو ایک بار پھر بڑے پردے پر دیکھنے کے منتظر ہیں۔