مرنے میں دو دن رہ گئے اور باتیں سنو! بشریٰ انصاری کا جاوید اختر کو پاکستان کے خلاف زہر اگلنے پر دو ٹوک جواب

Bushra Ansari Solid Reply to Javed Akhtar

سینئر اداکارہ، لکھاری، گلوکارہ اور سماجی کارکن بشریٰ انصاری اس وقت یورپ کے دورے پر ہیں جہاں وہ مختلف فنڈ ریزنگ ایونٹس میں شرکت کر رہی ہیں۔ تاہم حال ہی میں ایک موقع پر انہوں نے بھارتی مصنف جاوید اختر کو آڑے ہاتھوں لے لیا جو بھارت کے ایک مبینہ فالس فلیگ آپریشن کے بعد پاکستان کے خلاف زہر اگلتے دکھائی دیے۔

بشریٰ نے سخت لہجے میں کہا، کیا تماشا لگا رکھا ہے بھارت نے؟ پہلے اپنے گھریلو مسائل پر نظر ڈالیں۔ جو پاکستانی خواتین بھارتی مردوں سے شادی کر کے چالیس سال سے وہاں مقیم ہیں، انہیں اب نکالا جا رہا ہے۔ پہلے ویزے دیے ہی کیوں تھے؟

انہوں نے جاوید اختر پر براہِ راست تنقید کرتے ہوئے کہا، آپ جیسے 'ادیب' بھارت میں کرائے کا مکان بھی مشکل سے حاصل کر سکے، اور اب پاکستان پر بھاشن دیتے پھر رہے ہیں؟ اللہ پر یقین نہیں، مگر اسلام اور پاکستان کے خلاف باتیں کرنے کا شوق ہے۔ کچھ تو عمر کا لحاظ کریں دو دن رہ گئے ہیں مرنے میں اور باتیں دیکھیں اپنی۔ کم از کم نصیرالدین شاہ جیسا وقار ہی اپنا لیں، جو خاموش رہنا بہتر سمجھتے ہیں۔

مزید طنز کرتے ہوئے کہا، ارنب گوسوامی تو اینکر نہیں، ایک چلتا پھرتا ہنگامہ ہے۔ اور وہ ریٹائرڈ میجر؟ جو ہر وقت پاکستان دشمنی میں مبتلا رہتا ہے؟ وہ تو بالکل فضول باتیں کرتا ہے۔

لیکن بشریٰ انصاری نے واضح کیا کہ وہ عوام سے نہیں بلکہ خاص ذہنیت رکھنے والے لوگوں سے شکوہ کر رہی ہیں۔

ان کا کہنا تھا، یقین کریں، میں نے یہاں ایک بھارتی لڑکی سے ملاقات کی، وہ بہت محبت کرنے والی تھی۔ مسئلہ عوام کا نہیں، حکومتوں اور ایسے زہریلے دماغوں کا ہے۔ لوگ تو آج بھی محبت کے متلاشی ہیں، بس نفرتوں کی دیواریں اٹھا دی گئی ہیں۔