فہد مصطفیٰ کی ماں کا کردار نہیں کرسکتی تھی کیونکہ.. عتیقہ اوڈھو کے انکشاف پر لوگوں نے سوال کیوں کھڑے کردیے؟

عتیقہ اوڈھو نے اپنی وضاحت میں کہا، "میں نے فہد مصطفیٰ کی والدہ کا کردار اس لیے مسترد کیا کیونکہ ان سے عمر میں بہت کم ہوں۔ بشریٰ انصاری میرے مقابلے میں زیادہ عمر کی ہیں، اس لیے یہ کردار انہیں زیادہ مناسب لگا۔"

سینیئر اداکارہ عتیقہ اوڈھو نے انکشاف کیا کہ انہیں مقبول ڈرامے "کبھی میں کبھی تم" میں فہد مصطفیٰ کی والدہ کا کردار ادا کرنے کی پیشکش ہوئی تھی، مگر انہوں نے اپنی عمر کے فرق کے باعث اس کردار کو کرنے سے انکار کیا۔ اس ڈرامے کو پاکستان سمیت بھارت اور بنگلہ دیش جیسے ممالک میں بے حد پذیرائی مل رہی ہے۔

ہدایت کار بدر محمود نے ایک حالیہ انٹرویو میں بتایا کہ پہلے اس کردار کے لیے انہوں نے عتیقہ اوڈھو کا انتخاب کیا تھا، مگر اداکارہ کی مصروفیات کی وجہ سے بات نہ بن سکی۔ بعد میں جب بشریٰ انصاری نے یہ کردار نبھایا تو شائقین نے ان کے کام کو بے حد پسند کیا۔

سوشل میڈیا پر اس حوالے سے عتیقہ اوڈھو کو تنقید کا بھی سامنا ہے، جہاں کچھ صارفین سوال اٹھا رہے ہیں کہ جب انہوں نے "ہمسفر" میں فواد خان کی والدہ کا کردار کیا تھا تو فہد مصطفیٰ کے ساتھ انہیں کیا مسئلہ تھا۔