لاش ایک ہفتہ پرانی ہے۔۔ تنہا رہنے والی عائشہ خان کی موت کا کیسے پتہ چلا؟

Senior Actor Ayesha Khan Found Dead In Karachi

کراچی میں سینئر اداکارہ عائشہ خان اپنے گھر میں مردہ حالت میں پائی گئیں، ان کی عمر 77 برس تھی۔

کراچی کے علاقے گلشنِ اقبال میں واقع ایک فلیٹ سے انکی کئی دن پرانی لاش برآمد ہوئی ہے، پولیس نے واقعے کی تصدیق کر دی ہے۔

اہلِ محلہ کو فلیٹ سے شدید بدبو آنے پر شک ہوا، جس پر انہوں نے رشتہ داروں کو مطلع کیا۔ بعد ازاں، فلیٹ کا دروازہ کھولنے پر اداکارہ کی لاش برآمد ہوئی۔

پولیس کے مطابق، عائشہ خان تنہا رہ رہی تھیں اور ابتدائی تحقیقات سے اندازہ ہوتا ہے کہ ان کا انتقال تقریباً ایک ہفتہ قبل ہوا۔ لاش کو جناح اسپتال منتقل کرنے کے بعد سہراب گوٹھ ایدھی سردخانے میں رکھ دیا گیا ہے۔

پولیس کا کہنا ہے کہ اداکارہ عائشہ خان کا لواحقین کے کہنے پر پوسٹ مارٹم کیا جائے گا۔

اس افسوسناک خبر کی تصدیق اداکارہ کی قریبی دوست تہمینہ خالد نے بھی کی، جنہوں نے بتایا کہ عائشہ خان کا انتقال پانچ روز قبل ہوا تھا، لیکن کسی کو فوری اطلاع نہیں دی جا سکی۔

وہ پاکستان ٹیلی ویژن کے سنہری دور کی معروف فنکارہ تھیں۔ کئی سالوں سے وہ اسکرین سے دور تھیں اور اپنی نجی زندگی گزار رہی تھیں۔ وہ مشہور اداکارہ خالدہ ریاست کی بڑی بہن بھی تھیں۔

عائشہ خان کی زندگی کا اختتام جس تنہائی اور خاموشی میں ہوا، وہ مداحوں کے دلوں کو افسردہ کر گیا۔ ان کے فن، وقار اور کردار کو ہمیشہ یاد رکھا جائے گا۔