جوڑے کا نام ہی لباسِ نیلم رکھ دیا۔۔ نیلم منیر نے بارات پر کتنا قیمتی جوڑا پہنا؟

پاکستانی ٹی وی انڈسٹری کی دلکش اداکارہ نیلم منیر، جو اپنی منفرد اداکاری اور ہونٹوں کے تِل کی وجہ سے لاکھوں دلوں پر راج کرتی ہیں، نے اپنی شادی کی خوشخبری کے ساتھ مداحوں کو حیرت میں ڈال دیا۔ شادی کے حوالے سے طویل عرصے سے گردش کرتی خبروں کی مسلسل تردید کرنے کے بعد نیلم نے 2 جنوری کی شب مایوں کے دلکش انداز کی تصاویر اپلوڈ کر کے اپنی نئی زندگی کے آغاز کا اعلان کر دیا۔

نیلم منیر نے انسٹاگرام پر اپنی مایوں کی تصاویر شیئر کرتے ہوئے مداحوں کو اپنے حسین ترین روایتی لباس کا جلوہ دکھایا۔ سنہری کام اور نفاست سے تیار کیے گئے جوڑے میں نیلم کا یہ انداز ہر دل کو موہ لینے کے لیے کافی تھا۔ مایوں کی تصاویر کے ساتھ ہی شادی کی تقریبات کا آغاز ہوا، اور نیلم کے ہر انداز نے مداحوں کو اپنے سحر میں جکڑ لیا۔

اداکارہ کے بارات کے دن کے جوڑے نے سب کی توجہ کھینچ لی۔ روایتی مہرون اور سنہری امتزاج سے مزین اس لباس کو پاکستانی برینڈ "حسین" نے خاص طور پر نیلم کے لیے تیار کیا تھا۔ "لباسِ نیلم" نامی اس شاہکار کی قیمت 6 لاکھ 70 ہزار روپے بتائی گئی، اور اس کی خوبصورتی کو دیکھ کر مداحوں نے اسے بے مثال قرار دیا۔

نیلم نے اپنے عروسی لباس میں 90 کی دہائی کی دلہنوں کا منفرد انداز اپنایا۔ لانگ شرٹ اور فرشی لہنگے کی طرز پر بنایا گیا یہ جوڑا موجودہ دلہنوں کے عام فیشن سے بالکل مختلف تھا۔ رو سلک، جاما وار اور نیٹ فیبرکس پر مبنی اس لباس کو نفاست سے تیار کیا گیا، جبکہ سنہری کام اور روایتی دستکاری نے نیلم کو دیگر دلہنوں سے ممتاز بنا دیا۔

نیلم کے نکاح اور بارات کے لمحات کو بھی مداحوں نے بھرپور پسند کیا۔ دبئی میں منعقد ہونے والی شادی کی تقریب میں نیلم کے ہر انداز نے ان کے مداحوں کو دیوانہ بنا دیا۔ نیلم نے اپنے جوڑے اور لک کے ذریعے یہ ثابت کیا کہ وہ نہ صرف اداکاری بلکہ فیشن کے میدان میں بھی بے مثال ہیں۔