ناریل کے تیل سے غرارے کرنے سے کیا ہوتا ہے؟ جانیں سالوں پُرانے نسخے کے حیرت انگیز فوائد

ناریل کا تیل سردیوں میں تو سب سے زیادہ استعمال ہوتا ہے، چاہے وہ بالوں کی خوبصورتی کو بڑھانے کیلئے ہو یا چہرے اور ہاتھ پیروں کو موائسچرائز کروانے کے لیے۔۔ لیکن کیا آپ جانتے ہیں کہ ناریل کے تیل سے غرارے کرنے سے مہنگی دوائی جیسا فائدہ ہوتا ہے؟

ناریل کے تیل سے غرارے کرنا منہ اور دانتوں کی صحت سمیت کئی مسائل کا ایک قدیم علاج ہے، آج کے دور میں ماؤتھ واش سے غرارے کیے جاتے ہیں جبکہ پہلے کے دور میں کیمیکل والے ان ماؤتھ واش کی جگہ غرارے کرنے کے لئے مختلف تیل استعمال کئے جاتے تھے۔

آج ہم آپ کو بتائیں گے کہ ناریل کے تیل کے غرارے کرنے سے آپ کو کون سے فوائد حاصل ہو سکتے ہیں اور ایسا کرنے سے آپ کے کون سے مسائل حل ہو سکتے ہیں۔

ناریل کے تیل سے غرارے کرنے کے فوائد

اس تیل سے غرارے کرنے سے منہ کی بدبو در ہوتی ہے اس میں اینٹی بیکٹیریل خصوصیات موجود ہوتی ہیں اس لئے یہ منہ سے بدبو پیدا کرنے والے جراثیم کا خاتمہ کرتا ہے اور مسوڑھوں کی سوزش، جلن یا منہ کے چھالے ختم کرتا ہے۔

اکثر لوگوں کے دانتوں سے برش کرنے اور زیادہ کیمیکل والے ٹوتھ پیسٹ استعمال کرنے کی وجہ سے قدرتی چمک ختم ہو جاتی ہے ایسے میں اگر ناریل کے تیل سے غرارے کئے جائیں تو منہ کے مسائل دور ہونے کے ساتھ ساتھ دانتوں کی پیلاہٹ بھی دور ہوگی دانتوں میں چمک بھی آئے گی اور دانتوں سے کیڑا بھی دور ہوگا۔

یہ بات تو سب ہی جان چکے کہ ناریل کے تیل سے غرارے کرنے سے منہ اور دانتوں کے مسائل دور ہوتے ہیں لیکن یہ بات بہت ہی کم لوگ جانتے ہیں کہ ناریل کے تیل سے غرارے کرنے سے ہاضمہ بھی بہتر ہوتا ہے۔ اور تیزابیت بھی نہیں ہوتی جبکہ آنتوں سے بھی زہریلے مادوں کا اخراج ممکن ہوتا ہے۔

تیل سے غرارے کیسے کئے جائیں؟

ایک سے دو کھانے کے چمچ ناریل کے تیل کو منہ میں لیں اور اسے اچھی طرح دانتوں جبڑوں اور مسوڑھوں میں گھمائیں کم سے کم 1 سے 2 منٹ تک ایسا کریں اور پھر تیل کو تھوک دیں یاد رہے کہ آپ یہ تیل پی نہیں سکتے کیونکہ غرارے کرنے سے منہ کے جراثیم بھی شامل ہو جاتے ہیں اس لئے اسے پھینک دینا چاہیئے۔