میکے اور سسرال والے دونوں اسکے دیوانے ہیں ۔۔ کرینہ کپور خان نے اپنے خاندان کی پسندیدہ ڈش کا نام بتادیا

بالی ووڈ میں کپور فیملی کو جہاں ان کی فلمی صلاحیتوں اور قابلیت کی وجہ سے جانا جاتا ہے وہیں دوسری طرف ان کے کھانے پینے میں دلچسپی کی شہرت بھی مشہور ہے۔ آئے دن ان کی فیملیز میں کسی نہ کسی کے گھر دعوت ہوتی ہے اور خوب کھانے بنائے جاتے ہیں۔

حال ہی میں بھارتی اداکارہ کرینہ کپور خان نے ایک انٹرویو میں بتایا کہ، ان کا خاندان کھانے پینے کا بہت شوقین ہے اور جب سارے اکھٹے ہوتے ہیں تو صرف کھانے اور اداکاری پر ہی سب سے زیادہ بات ہوتی ہے۔

ان دعوتوں کے بارے میں بات کرتے ہوئے اداکارہ نے بتایا کہ، جب ہم سب اکھٹے ہوتے ہیں تو ہماری آوازیں اتنی اونچی ہوجاتی ہیں کہ اگر کوئی سُنے تو سمجھے گا کہ لڑائی ہورہی ہے۔

ان سے انٹرویو کے دوران پوچھا گیا کہ، ان کے لیے کیا چیز زیادہ اہم ہے کھانا یا اداکاری؟

جواب میں کرینہ کا کہنا تھا کہ، یہ بہت مشکل سوال ہے کیونکہ ہمارا خاندان ان دونوں چیزوں سے پیار کرتا ہے اور کھانے کے بارے میں کافی بات کی جاتی ہے۔

کھانے سے متعلق کرینہ سے سوال کیا گیا کہ، آپ کے خاندان میں سب سے زیادہ شوق سے کون سی ڈش کھائی جاتی ہے؟ جس پر اداکارہ نے بتایا کہ، "جب ہم سب ملتے ہیں تو سب سے زیادہ شوق سے پائے کھاتے ہیں یہ ایک بے حد ذائقہ دار سالن ہوتا ہے۔"

کرینہ آئے دن اپنے سسرال پٹودی خاندان اور اپنے میکے کپور خاندان کی دعوتوں کی تصاویر سوشل میڈیا پر پوسٹ کرتی ہیں۔