جمال کی موت کا منظر فلمانا آسان نہیں تھا۔۔ جویریہ اور سعود ڈرامے کے سین پر بات کرتے ہوئے دکھی ہوگئے

"ہمیں اندازہ نہیں تھا کہ جمال کی موت کا منظر مداحوں کو اتنی گہری تکلیف دے گا۔ مداحوں کے محبت بھرے کمنٹس نے دل کو چھو لیا ہے۔ یہ جان کر بہت خوشی ہوئی کہ ڈرامے کو اتنی محبت مل رہی ہے، مگر اس کے جذباتی مناظر نے سب کو ہلا کر رکھ دیا۔"

اداکار جوڑی، جویریہ سعود اور سعود قاسمی نے اپنے مداحوں کا شکریہ ادا کرتے ہوئے انسٹاگرام پر ایک ویڈیو شیئر کی، جس میں انہوں نے ڈرامے "بے بی باجی" کے جذباتی مناظر پر مداحوں کے ردعمل کا ذکر کیا۔ جویریہ کا کہنا تھا، "یہ مناظر دیکھنا اور شوٹ کروانا آسان نہیں تھا۔ جمال کی موت کے منظر نے نہ صرف مداحوں بلکہ ہمارے قریبی دوستوں اور رشتے داروں کو بھی شدید غمگین کر دیا۔"

جویریہ نے مزید انکشاف کیا کہ شوہر کی موت کا سین شوٹ کرواتے وقت انہوں نے ٹیم سے درخواست کی کہ شوٹنگ کو الگ اوقات میں کیا جائے تاکہ جذبات پر قابو پایا جا سکے۔ دلچسپ بات یہ ہے کہ جویریہ نے خود ابھی تک وہ قسط نہیں دیکھی، لیکن ہر طرف سے افسوس اور ہمدردی کے پیغامات انہیں موصول ہو رہے ہیں۔

جویریہ اور سعود نے مداحوں کی محبت اور حمایت کو سراہتے ہوئے کہا کہ ایسے مناظر نہ صرف پردے پر بلکہ حقیقی زندگی میں بھی لوگوں کے دلوں کو چھو جاتے ہیں۔ اس بیان کے ساتھ انہوں نے یہ تسلیم کیا کہ اس طرح کے جذباتی لمحات اداکاروں اور ناظرین دونوں کے لیے چیلنجنگ ہوتے ہیں۔ مداحوں کی مسلسل محبت اور حمایت کے لیے دونوں نے تہہ دل سے شکریہ ادا کیا۔

"بے بی باجی" نے ثابت کیا کہ صرف کہانی نہیں، جذبات کی شدت بھی لوگوں کے دلوں تک رسائی حاصل کر سکتی ہے۔