میں کسی اور سے پیار کرتی ہوں، مجھے ۔۔ حقیقی زندگی نے جب فلمی کہانی کا موڑ لے لیا تو کیا ہوا؟ دلچسپ واقعہ جس نے سب کو چونکا دیا

بھارتی فلم ساز سنجے لیلا بھنسالی کی 1999 کی سپر ہٹ فلم 'ہم دل دے چکے صنم' حقیقی زندگی کی کہانی بن گئی۔۔

بھارتی ریاست اتر پردیش کے دیوریا علاقے میں ایک شوہر نے اپنی بیوی کو اپنے سابق بوائے فرینڈ کے ساتھ دوبارہ ملنے میں مدد کی اور پھر اس سے اس کی شادی کر دی۔ عورت کا اپنے عاشق کے ساتھ جانے کا فیصلہ فلم کی اینڈنگ (اختتام) سے مختلف تھا، جبکہ فلم میں ایشوریا اپنے شوہر اجے کے ساتھ ہی رہنے کو ترجیح دیتی ہے۔

تفصیلات کے مطابق، جوڑے کی شادی کو ایک سال ہو چکا تھا، لیکن شوہر کو اس بات کا علم نہیں تھا کہ اس کی بیوی ابھی بھی بہار سے تعلق رکھنے والے ایک دوسرے لڑکے سے محبت کرتی ہے۔

لڑکی کا عاشق آکاش شاہ، جمعہ کی رات اسکے سسرال اس سے ملاقات کرنے پہنچ گیا، جس کے بعد ہنگامہ کھڑا ہوگیا اور سب کو اس بارے میں پتہ چل گیا۔ واقعہ کا علم ہونے کے بعد لوگوں نے آکاش شاہ کو پکڑ کرخوب مارا پیٹا۔

گوپال گنج، بہار کے رہنے والے آکاش شاہ نے دعویٰ کیا کہ وہ دو سال اس خاتون کے ساتھ رشتے میں رہا تھا۔ وہ اسے بھول نہیں سکتا تھا، یہاں تک کہ کسی اور مرد سے اس کی شادی ہونے کے بعد بھی۔ اسی لیئے وہ اس سے ملنے کا فیصلہ کر کے اس کے گھر پہنچا۔

تاہم خاتون کے شوہر نے جھگڑا کرنے کے بجائے انیں ملانے کا انتخاب کیا جس کی وجہ سے واقعات کا غیر متوقع موڑ آگیا۔

حکام کے مطابق، خاتون نے اپنے شوہر سے گزارش کی کہ وہ اسے اپنے بوائے فرینڈ کے ساتھ جانے دے، جس پر شوہر نے ان کا ساتھ دیا اور ان کی شادی کر دی۔

یہ شخص اپنی بیوی اور اس کے عاشق کو، دونوں خاندانوں کی منظوری کے بعد شادی کرنے کے لیے مندر لے گیا۔ اور وہیں سے شادی کرا کے انہیں روانہ کردیا۔