گوپی بہو کے دوست کی موت کیسے ہوئی؟ امریکا سے لاش واپس لانے کیلئے مودی سے اپیل کردی

میرے دوست کو امریکا میں جان سے مار دیا گیا، ان کی لاش بھارت واپس لائیں۔ یہ کہنا ہے بھارتی ڈرامہ سیریل میں مرکزی کردار نبھانے والی گوپی بہو (دیوولینا بھٹاچرجی) کا جنہوں نے اپیل کی ہے۔

بھارتی اداکارہ دیوولینا بھٹاچرجی نے امریکا میں قتل ہونے والے دوست کی لاش بھارت لانے کے لیے بھارتی وزیراعظم نریندر مودی سے اپیل کی ہے۔

سوشل میڈیا ویب سائٹ ایکس (ٹوئٹر) پر اپنے بیان میں اداکارہ دیوولینا بھٹاچرجی کا کہنا تھا کہ انکے دوست امرناتھ گھوش نامی شخص کو ریاست میسوری کے شہر سینٹ لوئس میں فائرنگ سے قتل کردیا گیا تھا۔

انہوں نے بتایا کہ ان کے دوست اپنے خاندان میں اکیلے کمانے والے تھے، انکی والدہ تین سال پہلے چل بسی تھیں جبکہ والد انکے بچپن میں فوت ہوگئے تھے۔

دیوولینا بھٹاچرجی نے یہ بھی لکھا کہ انکے دوست کو قتل کرنے والے ملزم سے متعلق معلومات سامنے نہیں آئیں اور نہ ہی اسکے محرکات سامنے آئے۔

انہوں نے لکھا کہ امرناتھ گھوش کے خاندان میں کوئی نہیں ہے جو انکے لیے لڑ سکے، صرف دوست ہی ہیں جو انکے لیے لڑ سکتے ہیں۔

دیوولینا نے اپنے ٹوئٹ میں بتایا کہ امرناتھ ایک بہت اچھے ڈانسر تھے، وہاں پی ایچ ڈی کر رہے تھے، مگر وہ شام میں باہر نکلے تو کچھ افراد نے انہیں فائرنگ سے قتل کردیا۔

دیوولینا نے امریکا میں بھارتی سفارتخانے، بھارتی وزیراعظم نریندر مودی اور وزیر خارجہ جے شنکر کو ٹیگ کرتے ہوئے اس معاملے کو دیکھنے کی درخواست کی۔