ملنے کا کہا تھا مگر اب دنیا سے چلا گیا۔۔ کراچی کے فلیٹ میں جھلس کر زندگی کی بازی ہارنے والے دو بھائیوں کی باتیں یاد کر کے دوست رو پڑے

امیر حمزہ یاروں کا یار اور خوش مزاج تھا۔ اتوار کو ہونے والے میچ کا منتظر تھا۔ پڑھائی اور کھیلوں کے درمیان توازن برقرار رکھنے میں الجھا ہوا تھا

ہم بات کررہے ہیں اس نوجوان کی جس کا انتقال کراچی کے ایک فلیٹ میں آگ لگنے کے باعث ہوا۔ زندگی میں جوان اولاد کی موت سے بڑا دکھ شاید ہی کوئی دوسرا ہو۔ کراچی کے ایک خاندان پر دکھوں کا یہ پہاڑ ایک نہیں 2 بار ٹوٹ چکا ہے۔ کل جھلس کر مرنے والے طلحہ کے بعد آج ان کے بھائی امیر حمزہ بھی دنیا ہمیشہ کے لئے چھوڑ کر چلے گئے۔

واضح رہے کہ پچھلے ہفتے کراچی کے علاقے گلشن اقبال میں نعمان ٹیرس کی عمارے کی پہلی منزل پر اچانک آگ بھڑک اٹھی تھی جس کی وجہ سے گھر میں موجود ٥ افراد جل گئے تھے۔ شدید زخمی ہونے کی وجہ سے گھر والوں کو اسپتال منتقل کیا گیا تھا جس میں سے 25 سالہ طلحہ کا انتقال کل جبکہ ان کے بھائی امیر حمزہ کا انتقال آج ہوا ہے۔

اطلاعات کے مطابق فلیٹ میں آگ شارٹ سرکٹ کی وجہ سے لگی تھی۔ مرنے والے دونوں بھائیوں میں طلحہ کافی خوش مزاج اور ہنس مکھ تھے۔ سوشل میڈیا پر وائرل ہونے والی پوسٹس کے مطابق طلحہ نے اپنے دونوں سے یہ کہا تھا کہ تصویریں لے لو کیا پتا کل ہو نہ ہو۔ ایک ایسی پوسٹ بھی وائرل ہے جس میں طلحہ نے اپنے دوست سے کل ملنے کا وعدہ کیا تھا مگر وہ کل ان کی زندگی میں نہ آسکی۔

طلحہ اور امیر حمزہ طاہر نے ابتدائی تعلیم ’چیپٹر اینڈ ورسس‘ سے حاصل کی۔ طلحہ اقراء یونیورسٹی سے تعلیم حاصل کرنے کے بعد یونیورسٹی میں ہی انٹرن شپ کررہے تھت جبکہ امیر حمزہ ابھی طالب علم تھے اور ساتھ ہی انشورنس کمپنی میں انٹرن شپ کررہے تھے۔ حادثے میں زخمی ہونے والے ان دونوں کے والدین اور بہن کی حالت ابھی بھی نازک ہے۔