صفائی کرے، زنگ دور کرے اور۔۔۔ جانیں ایک سافٹ ڈرنک آپ کے روزمرہ کے کاموں میں کس طرح آپ کی مدد کر سکتی ہے؟

سافٹ ڈرنک پینے سے تو ہمیں راحت ملتی ہے کھانا ہضم ہوتا ہے لیکن کیا آپ نے کبھی اس کو پینے کے علاوہ اور کسی کام کے لئے استعمال کیا ہے؟ اگر نہیں تو بس آج سے ہی آپ اس کا استعمال شروع کر دیں گے، کیونکہ آج ہم آپ کو بتائیں گے سوفٹ ڈرنک سے اپنے کئی کام آسان بنانے کے چند طریقے، تو چلیں پھر بنا دیر کرے شروع کرتے ہیں۔

سافٹ ڈرنک کے حیرت انگیز کمالات

بالوں سے چیونگم نکالنا

اگر آپ کے بالوں میں غلطی سے چیونگم لگ جائے تو آپ کیا کریں گے؟ آخر تھک ہار کر بال ہی کاٹ دیں گے کیونکہ اسے بالوں سے نکالنا بہت مشکل کام ہے، لیکن اب یہ مشکل اور نہیں، کیونکہ سافٹ ڈرنک آپ کا یہ کام آسانی سے کر سکتی ہے، اگر بالوں کے ساتھ کوئی ایسا حادثہ ہو کہ چیونگم چپک جائے تو بس بالوں کو کچھ دیر سافٹ ڈرنک میں بھگو لیں پھر دیکھیں کتنی آسانی سے چیونگم نکلتی ہے۔

باتھ روم کی صفائی

باتھ روم کی صفائی کرنا ایک مشکل کام ہے کیونکہ اس میں ضدی کھارے پانی کے پیلے داغ اور صابن وغیرہ کے داغ ہوتے ہیں، ساتھ ہی فلیش بھی صاف کرنا مشکل لگتا ہے کیونکہ یہ بہت زیادہ استعمال ہونے کی وجہ سے پیلا ہوجاتا ہے، لیکن یہ کام بھی سافٹ ڈرنک سے کرنا ہوا اب آسان، بس سافٹ ڈرنک کو باتھ روم میں ڈالیں، تھوڑا رگڑیں اور بس داغ دھبے اور پیلے نشانات منٹوں میں غائب ہو جائیں گے۔

میرینیٹنگ

چکن روسٹ بنانا ہے اور وقت کم ہے، ساتھ ہی آپ اسے بہت لذیذ بھی بنانا چاہتے ہیں تو بس پھر مرغی کو ایک باؤل میں ڈالیں، اور سافٹ ڈرنک اس میں ڈال کر اس کو میرینیٹ کریں پھر دیکھیں آپ کا روسٹ کتنا مزیدار اور لذیذ بنتا ہے۔

جلے ہوئے برتن صاف کرے

اکثر کھانا بناتے وقت برتن جل جاتے ہیں اور ان پر ضدی کالے نشان آ جاتے ہیں، اگر آپ کو بھی اس طرح کے برتن صاف کرنا چاہتے ہیں تو ان برتنوں میں سافٹ ڈرنک ڈال کر کچھ گھنٹوں کے لئے اسے چھوڑ دیں اور پھر اسے ڈش واشنگ اسکرب سے دھو لیں، جلے ہوئے نشانات غائب ہو جائیں گے اور برتن ہو جائیں گے ایک دم نئے جیسے، تو پھر آج یہ ٹپ آزمائیں۔

زنگ دور کرے

کھانے کے چمچ ہوں یا پھر نٹ بولٹ اور پانے کسی بھی قسم کے اوزار پر سے زنگ دور کرنے کے لئے آپ ان کو سافٹ ڈرنک میں ڈال کر چھوڑ دیں کچھ گھنٹے اور پھر دیکھیں کیسے سارا زنگ اُتر جائے گا اور بن جائیں گے آپ کے اوزار ایک دم صاف اور کارآمد۔
تو بس اس قسم کے مشکل کام آپ بھی بنائیں سافٹ ڈرنک کے استعمال سے آسان اور آج ہی سے اس کا استعمال شروع کر دیں۔