چیز لینے نکلا پھر واپس نہ آیا۔۔ 6 روز سے لاپتہ سعد کی لاش ملنے پر کہرام مچ گیا، بچے کے ساتھ کیا ہوا؟

7 Year Old Boy Body Found From Garbage In Karachi

کراچی کے علاقے لانڈھی میں ایک دل دہلا دینے والا سانحہ پیش آیا جس نے ہر دل کو غمگین کر دیا۔ سات سالہ سعد علی، جو والدین کا اکلوتا اور نہایت لاڈلا بیٹا تھا، کئی دنوں سے لاپتہ تھا۔ اہل خانہ نے ہر ممکن تلاش کی، مقدمہ درج کرایا، مگر کسی کو کچھ پتا نہ چل سکا۔

لیکن پھر چھ دن بعد محض چند قدم دور کچرے کے ڈھیر سے اس کی بوری بند لاش برآمد ہوئی تو پورا محلہ سوگ میں ڈوب گیا اور گھر میں قیامت برپا ہوگئی۔

اہلِ علاقہ کے مطابق سعد 18 ستمبر کو قریبی دکان سے چیز لینے نکلا تھا اور پھر واپس نہ آیا۔ والدین بے بسی کے عالم میں در در بھٹکتے رہے۔ پیر کی رات جب بچے کی نعش ملی تو ماں باپ پر غشی کے دورے پڑ گئے اور گلیوں میں کہرام مچ گیا۔

پولیس کے مطابق پوسٹ مارٹم رپورٹ میں انکشاف ہوا کہ سعد کے سر پر سخت چیز لگنے سے جان گئی جبکہ افسوسناک طور پر جنسی زیادتی کے شواہد بھی ملے ہیں۔ لاش ورثا کے حوالے کر دی گئی اور ظہر کے بعد نمازِ جنازہ و تدفین ادا کی گئی۔ یہ اندوہناک واقعہ پورے علاقے کو سکتے میں ڈال گیا ہے اور لوگ انصاف کے منتظر ہیں۔

تدفین کے بعد ورثا اور اہلِ محلہ غم و غصے سے بھرے لانڈھی تھانے کے باہر جمع ہوگئے۔ خواتین اور بچے بڑی تعداد میں سراپا احتجاج بن گئے، سڑکیں بند ہوگئیں اور ماحول میں صدمے اور کرب کی کیفیت ہر سو پھیل گئی۔ سب کی ایک ہی صدا ہے، قاتل کو کیفرِ کردار تک پہنچایا جائے۔