یہ اداکاری بھی کر چکی ہیں۔۔ ثناء یوسف نے کس پاکستانی ڈرامے میں کام کیا تھا؟ پرانی ویڈیو کلپ دیکھ کر صارفین چونک گئے

Sana Yousuf In Pakistani Drama Woh Ziddi Si

اسلام آباد میں قتل ہونے والی 17 سالہ ٹک ٹاکر ثنا یوسف کی زندگی کا ایک ایسا پہلو سامنے آیا ہے، جس نے سوشل میڈیا صارفین کو چونکا دیا ہے۔ بہت کم لوگ جانتے تھے کہ سوشل میڈیا پر شہرت حاصل کرنے سے پہلے وہ ایک ٹی وی ڈرامے میں بھی اپنی موجودگی درج کروا چکی تھیں۔

ڈرامے میں اداکاری کی جھلک:

سوشل میڈیا پر وائرل ہونے والی تصاویر نے انکشاف کیا ہے کہ ثنا یوسف نے ہم ٹی وی کے مشہور ڈرامے "وہ ضدی سی" میں مختصر کردار ادا کیا تھا۔ اس سیریل میں مرکزی کردار عینا آصف نے ادا کیا، جو ان دنوں 'پرورش' اور 'جڑواں' جیسے ڈراموں میں اپنی صلاحیتوں کا لوہا منوا رہی ہیں۔

ثنا، ڈرامے میں عینا کی کلاس فیلو کے طور پر نظر آئیں، اور سیٹ پر دونوں اداکاراؤں کے درمیان بننے والی دوستی کی جھلکیاں ان تصاویر میں واضح ہیں، جہاں وہ ہنستی مسکراتی، بے فکری سے کیمرے کے سامنے کھڑی دکھائی دیتی ہیں۔

ایک ابھرتی ہوئی فنکارہ کا ٹوٹتا ہوا خواب:

ثنا یوسف کا اداکاری کی دنیا میں قدم رکھنا ان کے شوق اور ٹیلنٹ کا ثبوت تھا۔ محض 17 برس کی عمر میں وہ ٹک ٹاک پر تو مقبول ہو ہی چکی تھیں، مگر ٹی وی پر ان کی موجودگی نے ظاہر کیا کہ وہ بڑی اسکرین کی جانب بھی قدم بڑھا رہی تھیں۔ ان کا سفر ابھی شروع ہی ہوا تھا کہ اچانک 2 جون کو اسلام آباد میں ان کا بے رحمانہ قتل ہوگیا۔

قتل، گرفتاری اور عدالتی کارروائی

ثنا کے قتل کے الزام میں عمر حیات نامی شخص کو فیصل آباد سے اگلے ہی روز گرفتار کیا گیا۔ پولیس تحقیقات جاری ہیں اور ملزم کو عدالت میں پیش کیا جا رہا ہے۔ واقعے کی سنگینی اور ثنا کی کم عمری نے اس کیس کو سوشل میڈیا پر بھی ایک توجہ کا مرکز بنا دیا ہے۔