میں باپ بننا چاہتا ہوں مگر۔۔ کنوارے سلمان خان نے اپنی دلی خواہش کا اظہار کرتے عامر خان سے کیا کہا؟

Salman Khan Expresses His Desire To Have Children

بولی وڈ کے دبنگ ہیرو سلمان خان نے ایک بار پھر مداحوں کو چونکا دیا ہے۔ شادی کو اب تک سنجیدگی سے نہ لینے والے سلمان نے اعتراف کیا کہ وہ باپ بننے کے بارے میں سنجیدگی سے غور کر رہے ہیں، چاہے شادی ہو یا نہ ہو۔

یہ انکشاف اس وقت ہوا جب سلمان خان اپنے دوست عامر خان کے ساتھ کاجول اور ٹوئنکل کھنہ کے او ٹی ٹی شو ٹو مچ کے پہلے ایپیسوڈ میں شریک ہوئے۔ دونوں سپر اسٹارز نے اپنی ذاتی زندگی کے کئی رازوں سے پردہ اٹھایا۔

گفتگو کے دوران عامر خان نے بتایا کہ ان کی اور سلمان کی حقیقی دوستی اس وقت ہوئی جب وہ اپنی سابقہ اہلیہ رینا سے طلاق کے دور سے گزر رہے تھے۔ عامر نے مسکراتے ہوئے کہا، تمہیں یاد ہے سلمان؟ تم ایک رات کھانے پر آئے تھے، اور تب پہلی بار ہم نے دل کی باتیں کیں۔ اس سے پہلے تو مجھے لگتا تھا کہ یہ بندہ ہمیشہ لیٹ آتا ہے، خاص طور پر ’انداز اپنا اپنا‘ کی شوٹنگ کے وقت۔

سلمان خان نے بات آگے بڑھاتے ہوئے کہا کہ اکثر رفاقتوں میں اسی وقت دراڑ آتی ہے جب ایک ساتھی دوسرے سے زیادہ تیزی سے آگے نکلنے لگے۔ ان کے مطابق، ایک ساتھ آگے بڑھنے کا ہنر ہی دوستی کو مضبوط رکھتا ہے۔

پھر عامر نے موقع غنیمت جان کر دبنگ خان سے شادی کے بارے میں سوال کیا۔ اس پر سلمان نے قہقہہ لگاتے ہوئے جواب دیا، اگر قصور وار کوئی ہے تو وہ میں ہوں۔ شادی کا تو مجھے خاص شوق نہیں، لیکن بچوں کے بارے میں ضرور سنجیدہ ہوں۔

یعنی دبنگ خان کے مداحوں کے لیے یہ پیغام صاف ہے—شادی ابھی سلمان کے منصوبوں میں نہیں، لیکن پدرانہ خواب ان کے دل میں ضرور پل رہے ہیں۔