لڑائیوں کی وجہ عورتیں ہوتی ہیں کیونکہ۔۔ صبا فیصل نے بڑھتی ہوئی طلاقوں کا ملبہ خواتین پر ڈالتے ہوئے کیا کچھ کہہ دیا؟

Saba Faisal Blames Women For High Divorce Rates

پاکستانی ڈرامہ انڈسٹری کی معروف اور سینئر اداکارہ صبا فیصل ایک مرتبہ پھر خبروں میں ہیں۔ ہر بڑے اسکرپٹ کا حصہ رہنے والی صبا فیصل سوشل میڈیا پر بھی خوب ایکٹو رہتی ہیں۔

حال ہی میں وہ حنا نیازی کے شو کی مہمان بنیں جہاں انہوں نے معاشرتی تبدیلیوں پر کھل کر بات کی۔ شو میں گفتگو کے دوران صبا فیصل نے ملک میں بڑھتی ہوئی طلاقوں پر اپنی رائے کا اظہار کیا۔

ان کا کہنا تھا کہ آج کل کی خواتین مردوں سے مقابلے کی دوڑ میں شامل ہو گئی ہیں، جو رشتے کو بگاڑنے کا سبب بنتا ہے۔

انہوں نے کہا، مرد کو اللہ تعالیٰ نے ایک خاص مقام دیا ہے، اس میں مقابلے کی گنجائش ہی نہیں۔ جب عورت اور مرد ایک دوسرے سے مسابقت کریں گے تو رشتہ چل نہیں سکتا، توازن برقرار رکھنا ضروری ہے۔

صبا فیصل کا یہ بیان سوشل میڈیا پر مختلف آرا کو جنم دے رہا ہے، مگر ان کا موقف یہی ہے کہ دونوں فریقین کو رشتے میں اپنی اپنی حدود اور مقام کا خیال رکھنا چاہیے۔

سوشل میڈیا سے محبت:

صبا فیصل نے یہ بھی انکشاف کیا کہ وہ ہمیشہ سے سوشل میڈیا پر فعال رہی ہیں اور اپنی زندگی کی جھلکیاں مداحوں کے ساتھ شیئر کرتی رہتی ہیں۔ ان کا کہنا تھا، مجھے ہمیشہ سوشل میڈیا سے پیار ہی ملا ہے۔ بس ایک مرتبہ جب بہو سے جھگڑے والی پوسٹ کی، تب لوگوں نے تنقید کی، ورنہ میرے فالوورز ہمیشہ محبت کرتے ہیں۔

انہوں نے بتایا کہ چونکہ وہ کام کے سلسلے میں کراچی میں رہتی ہیں اور ان کا خاندان لاہور میں ہے، اسی لیے سوشل میڈیا کے ذریعے وہ اپنے چاہنے والوں سے جُڑی رہتی ہیں۔