کھانا جلدی بنانا ہے لیکن کُکر پھٹنے سے ڈر بھی لگتا ہے؟ جانیں پریشر کُکر استعمال کرنے کا صحیح طریقہ، جو خواتین کی مشکل آسان کرئے

Pressure Cooker Istemal Karne Ka Sahi Tarika

تقریباً ہر گھر کی کچن میں موجود ایک عام سا برتن پریشر ککر، جو کھانا تیزی سے تیار کر دیتا ہے، لیکن یہی سہولت اگر بے دھیانی سے استعمال ہو، تو یہ خطرناک بھی بن سکتا ہے۔

عموماً خواتین جلدی میں پریشر ککر کا ڈھکن کھولتے ہوئے چہرہ قریب لے آتی ہیں، جو کہ ایک انتہائی خطرناک عمل ہے۔ جب ککر کھلتا ہے تو بھاپ سیدھی چہرے سے ٹکرا سکتی ہے، جو نہ صرف جلد کو جھلسا سکتی ہے بلکہ آنکھوں، ہونٹوں اور ہاتھوں پر بھی اثر ڈالتی ہے۔

کئی بار ایسا بھی ہوتا ہے کہ خواتین سیٹی ہٹانے کی جلد بازی میں ہاتھ سے پکڑ کر اتارنے کی کوشش کرتی ہیں، جو انگلیوں کو جلا سکتی ہے — اور اگر جلنے کی شدت زیادہ ہو تو انگلیوں کے اندرونی ٹشوز بھی متاثر ہو سکتے ہیں۔

کُکر استعمال کرنے کا صحیح طریقہ:

۔ ڈھکن کی ربڑ پر تھوڑا سا آئل لگا لیں تاکہ وہ آسانی سے سیل ہو جائے اور گیس لیک نہ ہو۔

۔ ککر کو اوور فل نہ کریں۔ ہمیشہ ایک تہائی حصہ خالی رکھیں تاکہ بھاپ کو جگہ مل سکے۔

۔ کھانے کے دوران ککر کے پاس کھڑے نہ ہوں۔ جیسے ہی سیٹی بجے، چولہا کم کر دیں یا بند کر دیں۔

۔ پانی مناسب مقدار میں رکھیں۔ بہت کم پانی جلدی خشک ہو جاتا ہے، جس سے جلنے یا پھٹنے کا خطرہ بڑھ جاتا ہے۔

۔ اگر کھولنے کی جلدی ہے تو مکمل دباؤ ختم ہونے تک انتظار کریں۔ جلد بازی خطرناک ہو سکتی ہے۔

ککر کی صفائی اور اُبال کا مسئلہ؟

اگر ککر یا پتیلی کا کھانا اُبل کر باہر نکل آتا ہے، تو ربڑ یا ڈھکن کے کنارے پر ہلکا سا آئل لگا دیں۔ یا اگر کھلا پکا رہے ہیں تو لکڑی کا چمچ برتن کے اوپر رکھ دیں، کھانا باہر نہیں آئے گا — نہ چولہا گندا ہوگا، نہ پتیلی۔

سادہ ککر یا الیکٹرک ککر؟

روایتی پریشر ککر سستا اور عام ہے، لیکن وقت کے ساتھ اس کے ربڑ، سیٹی یا باڈی میں مسئلے آ سکتے ہیں۔

جبکہ الیکٹرک ککر ایک جدید متبادل ہے — اس میں ٹائمر، آٹو سیفٹی، اور محفوظ کھانا پکانے کی سہولت موجود ہے۔ یعنی 5 منٹ میں کھانا تیار، بغیر دھماکے کے خوف کے۔

یاد رکھیں، پریشر ککر سہولت ہے، لیکن صرف اُس وقت جب استعمال احتیاط سے کیا جائے۔