گھر کی بھنڈی اور بینگن۔۔ مشہور ادکاراؤں نے پہلی بار بچت کے طریقے بتا دیے

کفایت شعاری نہ صرف زندگی کو بہتر بنانے کا ذریعہ ہے بلکہ مالی استحکام کی کنجی بھی ہے۔ فضول خرچی کے برعکس، اپنے وسائل کو دانشمندی سے استعمال کرنا انسان کو کامیابی کی طرف لے جاتا ہے۔ یہی پیغام دیا گیا اے آر وائی ڈیجیٹل کے مشہور پروگرام "گڈ مارننگ پاکستان" میں، جہاں شوبز کی معروف شخصیات نے اپنے تجربات شیئر کیے۔

پروگرام میں شرکت کرنے والوں میں اداکار افضل خان (جان ریمبو)، ان کی اہلیہ صاحبہ، ہربلسٹ ڈاکٹر ام راحیل، اور اداکارہ فریدہ شبیر شامل تھیں، جنہوں نے بتایا کہ کس طرح گھریلو اخراجات کو کم کیا جا سکتا ہے۔

اداکارہ صاحبہ نے کہا کہ باغبانی ایک زبردست طریقہ ہے، جس کے ذریعے نہ صرف گھر خوبصورت بنایا جا سکتا ہے بلکہ پیسے کی بھی بچت ہوتی ہے۔ انہوں نے بتایا کہ وہ اپنے گھر میں سبزیاں اُگا کر بازار کے خرچ سے بچتی ہیں۔

اداکار ریمبو نے مزید کہا کہ اس مرتبہ بازار سے بینگن خریدنے کی ضرورت نہیں پڑی کیونکہ وہ گھر کے باغ میں اُگائے تھے، جنہیں خود توڑ کر پکا لیا۔

فریدہ شبیر نے بتایا کہ ان کے گھر میں بھنڈی کے پودے لگے ہوئے ہیں، جس سے انہیں بازار جانے کی زحمت نہیں ہوتی۔ مزید یہ کہ روزمرہ کاموں کے لیے گاڑی کی جگہ موٹر سائیکل کا استعمال انہیں اخراجات میں کمی لانے میں مدد دیتا ہے۔

ہربلسٹ ڈاکٹر ام راحیل نے اپنی کفایت شعاری کی حکمت عملی بتاتے ہوئے کہا کہ انہوں نے ایک خاص ٹرنک بنا رکھا ہے جس میں سیل پر دستیاب کپڑے اور برتن رکھتی ہیں۔ یہ اشیاء کسی تقریب میں تحفہ دینے کے لیے پہلے سے موجود ہوتی ہیں، اور اضافی خرچ کی ضرورت نہیں پڑتی۔

یہ پروگرام اس بات کی جیتی جاگتی مثال تھا کہ چھوٹی چھوٹی تبدیلیاں زندگی میں بڑی آسانیاں پیدا کر سکتی ہیں اور کفایت شعاری کو عادت بنا کر زندگی کو بہتر اور پرسکون بنایا جا سکتا ہے۔