سردی کے موسم میں ویزلین گھر بھر کی ضرورت بن جاتی ہے جو صرف ہماری خوبصورتی کو بڑھانے کے لیے نہیں بلکہ اپنے روزمرہ کے دیگر مسائل کو بھی حل کرنے میں کام آتی ہے۔ اس کی مدد سے ہم چولہے کو بھی چمکا سکتے ہیں۔ آج کے فوڈز میں آپ کو بتاتے ہیں گیس کی کمی کو ویزلین سے دور کرنے کی انوکھی ٹپ۔
گیس کی لوڈشیڈنگ سب سے زیادہ سردی میں ہوتی ہے اور وہ بھی ان اوقات میں جن میں بچے اسکول جاتے ہیں اور مرد حضرات اپنی نوکریوں کو اور پھر جب یہ واپس آتے ہیں تو اس وقت بھی گیس نہیں ہوتی۔ یہ پاکستانی خواتین کے لیے سب سے بڑی مشکل ہے کیونکہ بچے بھوکے پیٹ جاتے ہیں یا تو رات دیر کو اٹھ کر ان کیلئے کھانا بنا کر رکھیں، مگر گرم کرنے کے لیے بھی گیس نہیں ہوتی۔ گیس کی اس لوڈشیڈنگ سے ہم لوگ ہر سال ہی پریشان رہتے ہیں کیونکہ پریشر کم سے کم کر دیا جاتا ہے۔ جب گیس آ بھی رہی ہوتی ہے تو وہ اس قابل نہیں ہوتی کہ جلدی سے ایک کپ چائے ہی تیار کرلی جائے۔ سب سے بڑی مشکل کی بات یہ ہے کہ اس موسم میں اگر کوئی مہمان آ جائیں تو زیادہ شرمندگی ہوتی ہے۔ اکثر گیس تو پوری آرہی ہوتی ہے لیکن آپ کو وہ کم محسوس ہوتی ہے اور کھانا بنانے میں بھی وقت زیادہ درکار ہوتا ہے اس کی ایک وجہ یہ بھی ہوتی ہے کہ چولہے کے برنر میں موجود چھوٹے چھوٹے سوراخوں میں بھی کچرا گھس جاتا ہے اور اس کچرے کی وجہ سے گیس ٹھیک سے برتن تک نہیں پہنچ پاتی۔ اس لیے آپ ماچس کی تیلیوں کو ویزلین میں لگائیں اور اس کو برنر کے سوراخوں میں گھسائیں اور پھر نکال دیں اس طرح سے ان سوراخوں کی صفائی کے بعد چولہے کو آن کریں اور گیس کسی حد تک مناسب رفتار میں پائیں۔