یہ سراسر پاگل پن ہے۔۔ اسد صدیقی بیٹی کو اسکول کیوں نہیں بھیجنا چاہتے؟ وجہ بتاتے ہوئے دیگر والدین پر بھی کڑی تنقید

Asad Siddiqui Calls Out Parents For Early Admission In schools

پاکستانی اداکار و ماڈل اسد صدیقی نے حال ہی میں والدین اور اسکولوں کے اس بڑھتے ہوئے رجحان پر سخت تنقید کی جس میں بچوں کو ناسمجھی کی عمر میں ہی تعلیمی اداروں کا بوجھ اٹھانا پڑتا ہے۔

ایک پروگرام میں گفتگو کرتے ہوئے اُنہوں نے بتایا کہ ان کی بیٹی کی عمر ابھی ڈیڑھ سال ہے اور وہ سمجھتے ہیں کہ اتنی کم عمر میں بچے کو اسکول بھیج دینا نہ صرف نامناسب بلکہ سراسر جلد بازی ہے۔

اسد صدیقی کے مطابق ڈیڑھ سال تو کیا، چار اور پانچ سال بھی وہ صحیح وقت نہیں جس میں بچے کو کسی باقاعدہ تعلیمی سسٹم میں دھکیل دیا جائے۔ ان کا کہنا تھا کہ، زیادہ تر اسکولز کا زور تعلیم سے زیادہ کمائی پر ہوتا ہے، جبکہ اسی ماحول میں بچوں کے اندر طبقاتی فرق کا احساس بھی جنم لینے لگتا ہے۔ ان کے خیال میں حقیقی تربیت کا آغاز والدین سے ہوتا ہے، اور گھر ہی وہ پہلی درسگاہ ہے جہاں بچہ سیکھنے کی بنیاد پکڑتا ہے—اسکول صرف تب فائدہ دیتے ہیں جب بچہ ذہنی طور پر تیار ہو جائے۔

انہوں نے مثال دیتے ہوئے بتایا کہ فن لینڈ جیسے ترقی یافتہ ملک میں سات برس سے پہلے بچوں کو اسکول بھیجنے کی اجازت ہی نہیں، اور یہ فیصلہ سائنسی تحقیق کی بنیاد پر لیا گیا ہے تاکہ بچے فطری رفتار سے نشوونما پا سکیں۔

اسد صدیقی نے یہ بھی کہا کہ اسلامی نقطۂ نظر سے بھی چھوٹی عمر کے بچوں کو والدین کے قریب رکھ کر اُن کی تربیت کرنا زیادہ بہتر سمجھا جاتا ہے، کیونکہ ابتدائی سالوں میں محبت، توجہ اور گھر کی تعلیم ہی شخصیت کو اصل سمت فراہم کرتی ہے۔