Palak Gosht Recipe in Urdu

اجزاء:
عام طور پر پالک سردیوں میں زیادہ کھائی جاتی ہے اور جب اس میں گوشت ڈال کر پکایا جائے تو اسکا مزہ دوبالا ہوجاتا ہے۔ لیکن اکثر ایسا ہوتا ہے کہ جو پالک ہم بازار کے کسی ہوٹل سے منگوا کر یا جا کر کھاتے ہیں اسکا ذائقہ گھر والے ذائقے سے مختلف ہوتا ہے، پر ایسا کیوں ہے؟
تو آئیے آج آپ کو ہم وہ سیکرٹ ریسیپی بتاتے ہیں جو ہوٹل والے استعمال کرتے ہیں۔

2 کلو پالک گوشت بنانے کی ترکیب:

پہلے مصالحہ بنالیں:

۔ گوشت کو پہلے سے ابال کر اسکی یخنی الگ کردیں

۔ ایک دیگچی میں 500 گرام گھی ڈال کر گرم کریں پھر ½ کلو باریک کٹی پیاز ڈال کر گولڈن براؤن کرلیں

۔ اب اس میں 4 چمچ ادرک لہسن کا پیسٹ ڈال کر 1 منٹ تک پکائیں، پھر اس میں زیرہ 2 چمچ، 4-5 دارچینی، کالی مرچ 1 چمچ اور لانگ 1 چمچ ڈال کر ہلائیں

۔ اسکے بعد ½ کلو ٹماٹر پیسٹ (یا کاٹ کر) شامل کر کے اسے بھون لیں، پھر اس میں نمک حسبِ ذائقہ، لال مرچ دیڑھ چمچ، ہلدی 1 چمچ اور کٹا ہوا دھنیا 1 چمچ ڈال کر مکس کریں اور میں تھوڑی سی یخنی ڈال کر پکائیں

۔ 8 سے 10 منٹ بھوننے کے بعد پھر تھوڑی یخنی شامل کریں، کچھ دیر میں بہترین سالن تیار ہوجائے گا

پالک شامل کریں:

۔ آپ 4 کلو پالک کو صاف کرنے کے بعد اسے 20 سے 25 منٹ تک ابال کر ہلکا سا پیس لیں

۔ اب اس پالک کو مصالحے میں ڈال کر اچھے سے مکس کریں اور 20 منٹ تک پکائیں ہری مرچ ڈال کر

۔ جب سالن میں گاڑھا پن اور تری اوپر آجائے تو اس میں 2 کلو ابلا ہوا گوشت شامل کر کے مزید 15 منٹ تک پکائیں تا کہ گوشت اسکا ذائقہ جذب کرلے

۔ اب بچی ہوئی یخنی اور آدھا کلو دودھ ڈال کر تیز آنچ پر پکائیں، دودھ شامل کرنے سے ہوٹل اور شادیوں والے پالک گوشت کا ذائقہ آتا ہے

۔ تھوڑی دیر بعد چولہا ہلکا کر کے مکمل ڈھکن ڈھک دیں اور تری اوپر آنے تک چھوڑ دیں، آخر میں 1 چمچ گرم مصالحہ، ہرا دھنیا اور ہری مرچ اوپر سے ڈال دیں

۔ مزیدار پالک گوشت کی ہوٹل ریسیپی تیار ہے۔