تمکنت منصور نے ساتھی فنکار کو آڑے ہاتھوں لیتے ہوئے پاکستانی معاشرے کے جیفری ایپسٹین کو بے نقاب کر دیا

Tamkenat Mansoor Calls Firdous Jamal Pakistani Epstein In Her Latest Video

تمکنت منصور ایک بے باک آواز کے طور پر سامنے آئی ہیں جو معاشرے میں پھیلے ہوئے پدرشاہی رویوں اور بچوں کے ساتھ ہونے والے استحصال کے خلاف کھل کر بات کرتی ہیں۔ حال ہی میں انہوں نے بغیر نام لیئے فردوس جمال کے ایک بیان پر سخت ردِعمل دیا، جس میں کم عمر لڑکیوں کو زیادہ پرکشش قرار دیا گیا تھا۔

تمکنت منصور نے ان کے بیان کو نہ صرف غیر ذمہ دارانہ بلکہ خطرناک ذہنیت کی عکاسی قرار دیا۔ ان کے مطابق، ایسی سوچ دراصل ایک شکاری رویہ ہے جو معاشرے میں موجود اس سنگین مسئلے کو مزید تقویت دیتی ہے جہاں کم عمر بچیاں اکثر اپنے ہی قریبی لوگوں کے ہاتھوں ہراسانی کا شکار ہوتی ہیں۔

انہوں نے اس بات پر زور دیا کہ ایسے واقعات صرف چند گھروں تک محدود نہیں بلکہ ایک خاموش حقیقت ہیں، جنہیں اکثر چھپا دیا جاتا ہے۔ متاثرہ بچوں کو انصاف دینے کے بجائے انہیں ہی موردِ الزام ٹھہرایا جاتا ہے، جبکہ اصل مجرم بچ نکلتا ہے۔

تمکنت منصور نے مزید کہا کہ جو لوگ کم عمر لڑکیوں کو مردوں کے لیے “پرکشش” قرار دیتے ہیں، وہ دراصل ہمارے معاشرے کے جیفری ایپسٹین جیسے کردار ہیں، جنہیں فوری طور پر روکا جانا چاہیے۔ انہوں نے میڈیا اور میزبانوں پر بھی ذمہ داری عائد کی کہ وہ ایسے بیانات کو چیلنج کریں۔

آخر میں انہوں نے والدین کو نصیحت کی کہ وہ اپنے بچوں کے ساتھ دوستانہ تعلق قائم کریں اور انہیں “گڈ ٹچ” اور “بیڈ ٹچ” کے بارے میں ضرور آگاہ کریں، تاکہ وہ خود کو محفوظ رکھ سکیں۔