سونف، وہ حیرت انگیز بیج جسے قدرت نے بےشمار فوائد سے نوازا ہے، انسانی صحت کے لیے کسی خزانے سے کم نہیں۔ یہ نہ صرف ایک مکمل غذا ہے بلکہ اگر دودھ کے ساتھ استعمال کیا جائے تو اس کی افادیت کئی گنا بڑھ جاتی ہے، خاص طور پر سردیوں کے موسم میں۔

سونف میں موجود وٹامن سی، پوٹاشیم، آئرن، مینگنیز اور فائبر جیسے اجزا اسے صحت کے لیے انتہائی قیمتی بناتے ہیں۔ اس کے علاوہ، یہ قدرتی خصوصیات جیسے اینٹی آکسیڈینٹ، اینٹی انفلامیٹری، اور کارمینیٹو کی بدولت نظام ہاضمہ سے جڑی ہر تکلیف کا بہترین علاج بھی ہے۔

ماہرین غذائیت کا کہنا ہے کہ سونف کا دودھ نہ صرف موٹاپے کو کنٹرول کرنے میں مددگار ہے بلکہ بھوک کو کم کرنے کا بھی ذریعہ ہے۔ فائبر کی موجودگی میٹابولزم کو تیز کرتی ہے اور کیلوریز جلانے کا عمل آسان بناتی ہے، جس سے وزن کم کرنے میں مدد ملتی ہے۔

اگر آپ کا پیٹ اکثر بھاری رہتا ہے یا سردیوں میں ہاضمے کے مسائل کا سامنا کرتے ہیں تو سونف کا دودھ پینا آپ کے لیے ایک جادوئی نسخہ ثابت ہو سکتا ہے۔ سونف میں موجود قدرتی تیل معدے کو تقویت دیتے ہیں، پیٹ پھولنے اور قبض جیسے مسائل کو فوری طور پر دور کرتے ہیں۔

یہی نہیں، سونف اور دودھ کا امتزاج بلڈ پریشر کو متوازن رکھنے میں بھی معاون ہے۔ سونف کے اندر پایا جانے والا پوٹاشیم، کیلشیم اور میگنیشیم اور دودھ میں موجود کیلشیم اور وٹامن ڈی ہڈیوں کو مضبوط بناتے ہیں، جو ہڈیوں کے درد کو کم کرنے میں مدد فراہم کرتے ہیں۔

سونف کا دودھ بنانے کا طریقہ:

ایک گلاس دودھ میں آدھا گلاس پانی شامل کریں اور اسے چولہے پر ابالنے رکھ دیں۔ جب دودھ ابلنا شروع ہو تو اس میں ایک چمچ سونف ڈال کر 10 منٹ تک پکائیں۔ دودھ کو ہلکا ٹھنڈا ہونے دیں، اور پھر اسے مزے لے کر نوش کریں۔

سونف کا دودھ نہ صرف صحت بخش ہے بلکہ سردیوں میں آپ کی روزمرہ زندگی کے لیے ایک توانائی بخش اضافہ ثابت ہو سکتا ہے۔ اسے اپنی غذا کا حصہ بنائیں اور صحت مند زندگی کا لطف اٹھائیں۔