بچہ گود لینا چاہتی تھی اور۔۔ شیفالی جری والا کی اچانک موت ہارٹ اٹیک سے نہیں تو پھر کیسے ہوئی؟ نیا انکشاف

Shefali Jariwala Death Cause

2002 کے مشہور گانے 'کانٹا لگا' سے شہرت پانے والی بھارتی ماڈل اور اداکارہ شفالی جری والا کی اچانک موت نے ان کے مداحوں اور شوبز انڈسٹری کو گہرے صدمے میں مبتلا کر دیا ہے۔ ان کی دل دہلا دینے والی رخصتی نے کئی سوالات کو جنم دیا ہے— کیا یہ واقعی قدرتی موت تھی، یا کوئی طبی غلطی؟

ابتدائی اطلاعات کے مطابق، شفالی کا انتقال دل کا دورہ پڑنے سے ہوا، مگر ان کے قریبی ڈاکٹر کا کہنا ہے کہ انہیں دل کی کوئی بیماری لاحق نہیں تھی۔ حیران کن طور پر، وہ گزشتہ کئی برسوں سے اینٹی ایجنگ انجیکشن اور مخصوص ادویات کا باقاعدگی سے استعمال کر رہی تھیں۔

خالی پیٹ دوا کھانا یا انجیکشن کا اثر؟

بھارتی میڈیا کے مطابق، پولیس ذرائع کا کہنا ہے کہ 27 جون کی دوپہر شفالی نے اینٹی ایجنگ انجیکشن لیا، اور شام میں اپنی روٹین میڈیسنز بھی استعمال کیں جبکہ اُس دن ان کا وِرَت تھا۔ بظاہر خالی پیٹ دوا کھانے سے ان کا بلڈ پریشر خطرناک حد تک گر گیا، جس کے بعد ان کے جسم میں کپکپی شروع ہوگئی۔

پولیس نے اس واقعے کو فی الوقت قدرتی موت قرار دیا ہے، مگر اسپتال میں کی گئی پوسٹ مارٹم رپورٹ کو اب تک جاری نہیں کیا گیا— شاید یہی وہ کڑی ہے جو اس المناک موت کے پیچھے چھپی اصل وجہ کو سامنے لائے۔

شوہر کا دکھ اور پرائیویسی کی اپیل:

اداکارہ کے شوہر پراگ تیاگی غم سے نڈھال نظر آئے۔ آخری رسومات کے موقع پر وہ اپنے جذبات پر قابو نہ رکھ سکے۔ میڈیا سے بات کرتے ہوئے انہوں نے ہاتھ جوڑ کر بس ایک ہی التجا کی؛

"براہِ کرم میری پری (شیفالی) کے لیئے دعا کریں، اور ہماری پرائیویسی کا احترام کریں۔ یہ وقت بہت مشکل ہے۔"

ایک روشن ستارہ، جو جلد بجھ گیا:

شفالی جری والا نے نہ صرف "بگ باس 13" اور "نچ بلیئے" جیسے ریئلٹی شوز میں اپنی شناخت بنائی، بلکہ وہ اپنی ذاتی زندگی میں بھی کئی چیلنجز سے نبرد آزما رہیں۔ مرگی کے مرض نے ان کے کیریئر کو محدود کر دیا، لیکن وہ ہر مشکل میں بھی مضبوطی سے کھڑی رہیں۔

انہوں نے 2014 میں اداکار پراگ تیاگی سے شادی کی، یہ ان کی دوسری شادی تھی۔ آخری برسوں میں وہ ایک بچی کو گود لینے کی خواہش رکھتی تھیں، مگر زندگی نے انہیں مہلت نہ دی۔