نیم کی نمولیوں کے چند حیرت انگیز فوائد اور استعمالات

نیم ایک صدا بہار درخت ہے اور یہ ہر موسم کو برداشت کرنے کی قوت رکھتا ہے، نیم کا درخت کڑوا تو ضرور ہوتا ہے مگر اس کے فوائد انسانوں کے لئے بہت میٹھے ثابت ہوتے ہیں، جہاں اس کے پتے کڑوے وہیں اس کے بیج جنہیں نیم کی نمولیاں بھی کہا جاتا ہے یہ میٹھی ہوتی ہے اور اس کا بےشمار طریقوں سے استعمال کیا جاتا ہے۔
آج ہم آپ کو بتائیں گے نیم کی نمولیوں کے چند حیرت انگیز استعمال اور حیران کن فوائد جو آپ نے پہلے کبھی نہیں سُنے ہوں تو آیئے پھر شروع کرتے ہیں۔

• نیم کی نمولیاں اور ان کا استعمال

جون کی گرمی میں نیم کا بیج بخوبی پک جاتا ہے، یہ بیج جنہیں نمولیاں بھی کہا جاتا ہے پکنے کے بعد بیج بن جاتا ہے جسے زمین دبا کر دوسرا درخت اُگایا جاتا ہے، نیم کی نمولیاں بچے اور بڑے شوق سے کھاتے ہیں، ان پھلوں کے اندر تخم ہوتے ہیں، جن کو نمبولی کہتے ہیں، اس سے تیل نکالا جاتا ہے جوکہ ادویات اور صابن بنانے کے کام آتا ہے ان کا اچار بھی بنایا جاتا ہے۔

• سر کے زخم دور کرنے کے لئے نسخہ

اکثر لوگوں کے سردی گرمی ہر موسم میں سر میں دانے ہو جاتے ہیں جو بعد میں زخم کی شکل اختیار کر لیتے ہیں، ان کو دور کرنے اور زخم کو خشک کرنے کے لئے نیم کی نمولیوں کا استعمال مفید ہے۔

• طریقہ استعمال

نیم کی نمولیوں کو باریک پیس کر اس کا گاڑھا پیسٹ بنا لیں، اب اس میں پانی ملا کر اسے لوشن جیسا بنا لیں پھر رات سوتے وقت اسے سر پر لگائیں جہاں جہاں دانے اور زخم ہوں اس پیسٹ کو لگائیں اور اگلی صبح سر دھو لیں، سر کے زخم خشک ہو جائیں گے اور دانے بھی نکلنا بند ہو جائیں گے۔

• خون صاف کرنے کے لئے مفید

نیم کی پتے، لکڑی، شاخ، جڑ، پھول، بیج یعنی اس کا ہر حصہ ہی فوائد سے بھرپور ہوتا ہے، خون صاف کرنے کے لئے نیم کی پکی ہوئی دس نمولیاں روزانہ چوسی جائیں تو اس سے خون صاف ہوجاتا ہے، نیم کے پتے پھول نمولی چھال اور جڑ سب کو چھاؤں میں سکھا کر پیس لیں ایک چوتھائی چمچ روزانہ استعمال کرنے سے اس سے ہر طرح کی خون کی پریشانی اور خون کی بیماریاں دور ہوجائیں گی اور آپ لمبی عمر تک صحت مند رہیں گے۔