عورتوں کا اتنا خوف کہ ۔۔ افریقی شہری نے 55 سال ایک کمرے میں گزار دیئے، آخر وہ خواتین سے اتنا ڈرتا کیوں ہے؟

ہر انسان کو کسی نہ کسی چیز کا خوف ہوتا ہے جیسے کوئی اونچائی سے ڈرتا ہے تو کوئی اندھیرے سے، کوئی بند جگہ سے گھبراتا ہے تو کوئی ہجوم سے۔ بس فرق صرف اتنا ہے کوئی اپنے ڈر پر قابو پا لیتا ہے تو کوئی سمٹ کے رہ جاتا ہے۔

ایسا ہی ایک ڈر افریقی شہر روانڈا میں رہنے والے ایک شخص کو بھی ہے۔ اسے خواتین سے ڈر لگتا ہے، جسکی وجہ سے اس نے اپنی زندگی کے 55 سال ایک کمرے میں گزارے۔

غیر ملکی خبر رساں ادارے کے مطابق، 71 سالہ کیلیٹسے زامویتا خواتین کے خوف سے 55 سال سے 15 فٹ کے ایک الگ تھلگ گھر میں رہ رہا ہے۔

جب ان سے اس ڈر کی وجہ پوچھی گئی تو ان کا کہنا تھا کہ، "16 سال کی عمر میں مجھے محسوس ہوا کہ خواتین کا قریب آنا میرے لیئے بہت زیادہ ناقابلِ برداشت ہے۔ اسلیئے فیصلہ کیا کہ خواتین کو اپنے پاس نہیں آنے دے سکتا، لہٰذا میں نے اپنے معمولی گھر کے ارد گرد لکڑی کی باڑ بنائی اور اس کے بعد سے اپنے گھر سے باہر قدم نہیں رکھا۔"

ایک مقامی خاتون نے میڈیا کو بتایا کہ، جب ہم میں سے کوئی اسکی مدد کرنے کی کوشش کرتا ہے تو وہ ہمیں قریب نہیں آنے دیتا نہ ہی بات کرتا ہے۔ اسلیئے ہم اس کے گھر میں چیزیں پھینک کر چلے جاتے ہیں جس کے بعد وہ باہر آتا ہے اور انہیں اٹھا کر لے جاتا ہے۔