رنگ خراب ہے یا دیمک کھا گئی؟ لکڑی کے پرانے فرنیچر کو بھی نئے جیسا بنانے کے سستے ٹوٹکے، جو آپ کی بڑی مشکل ہو آسان کردے

How To Polish Old Furniture At Home

اگر لکڑی کے فرنیچر میں دیمک لگنے لگے یا اس کا رنگ تیزی سے پھیکا پڑ جائے تو پریشان نہ ہوں، ہم آپ کے لیے ایسے آسان اور مؤثر طریقے لائے ہیں جن سے آپ اپنے قیمتی فرنیچر کو نقصان سے بچا کر لمبے عرصے تک نیا جیسا رکھ سکتے ہیں۔

ہمارے گھروں میں لکڑی کا فرنیچر ہونا اور اس میں مختلف مسئلوں کا ہونا ایک عام بات ہے، لیکن یہ عام بات پریشانی کا باعث تب بنتی ہے جب وہ ضرورت سے زیادہ خراب دکھنے لگیں یا پھر ان میں دیمک لگنا شروع ہوجائے۔

تو کے فوڈز آپ کو فرنیچر سے جڑے مختلف مسئلوں اور ان سے بچنے کیلیئے احتیاطی تدابیر بتائیں گے، جس کی مدد سے آپ کی مشکل آسان ہوجائے گی۔

دیمک عموماً لکڑی کے فرنیچر، دروازوں یا پھر سیلن والی جگہوں کو نشانہ بناتی ہیں۔ دیمک مار دواؤں یا اسپرے کروانے سے دیمک سے نجات مل تو جاتی ہے لیکن اتنی رقم خرچ کرنے کے بعد بھی ڈر لگا رہتا ہے کہ کہیں دیمک دوبارہ نہ ہوجائے۔ اسلیئے اس سے بچنے کیلیئے کچھ آسان سے ٹوٹکے ہیں جو آپ آزما سکتی ہیں۔

ٹوٹکے اور طریقہ کار:

۔ اسپرے بوتل میں مٹی کا تیل بھر لیں، پھر دیمک لگی جگہ پر اچھی طرح سے اس اسپرے کو کریں تاکہ وہ جگہ مٹی کے تیل سے تر ہوجائے۔ اس نسخے کو آزمانے کے بعد واضح فرق آپ خود دیکھیں گے

۔ گائے یا بکرے کے گوشت کا پانی دیمک کے خاتمے کے لیے کسی مہنگی دیمک مار دوائی سے کم نہیں ہے، بس اسپرے بوتل میں گوشت کا پانی بھریں اور دیمک والی جگہ پر اسکا چھڑکاؤ کریں۔ اس عمل سے دیمک کو کنٹرول کیا جاسکتا ہے۔

۔ سفید سرکہ بھی دیمک کے خاتمے کے لیے مفید ہے۔ آدھا گلاس سفید سرکہ میں 2 لیموں کا رس شامل کریں، پھر اس مکسچر کو اسپرے بوتل میں بھر کے دن میں دو مرتبہ دیمک والی جگہ پر اسکا چھڑکاؤ کریں اور کچھ دن تک یہ عمل جاری رکھیں۔

فرنیچر کا رنگ خراب ہونا:

فرنیچر کا رنگ خراب ہونے کی ایک اہم وجہ اسکا دھوپ میں یا دھوپ والی جگہ میں ہونا ہے۔ اکثر زیادہ درجہ حرارت والی جگہوں پر فرنیچر رکھنے سے اسکا رنگ پھیکا پڑنے لگتا ہے۔ اسکا آسان حل یہ ہے کہ آپ اپنے فرنیچر کو دھوپ سے بچائیں اور اسے مٹی کے تیل سے صاف کریں۔

مٹی کے تیل سے فرنیچر صاف کرنے سے اس میں چمک بھی آتی ہے اور نمی بھی ختم ہوتی ہے۔ ورنہ یہ نمی آپ کے فرنیچر میں سیلن پیدا کرسکتی ہے جس سے وہ پھول کر خراب ہوجاتا ہے