تربوز پر پانی نہ پینا یا مچھلی کے بعد دودھ کا استعمال۔۔ جانیں کھانوں سے متعلق غلط فہمیوں کی حقیقت کیا ہے اور افواہ کیا؟

Common Food Myths And The Truth Behind Them

ہمارے معاشرے میں کھانے پینے سے متعلق کئی ایسی باتیں نسل در نسل منتقل ہوتی رہی ہیں جنہیں لوگ بغیر تحقیق کے درست مان لیتے ہیں۔ خاص طور پر گرمیوں کے موسم میں غذا اور مشروبات کے حوالے سے مختلف تصورات عام ہیں، مگر ان میں سے بہت سی باتیں سائنسی حقائق سے مطابقت نہیں رکھتیں۔

ماہر غذائیت حاجرہ سلیم نے ایک گفتگو کے دوران ان مشہور غذائی غلط فہمیوں پر روشنی ڈالتے ہوئے بتایا کہ صحت مند رہنے کے لیے افواہوں پر نہیں بلکہ مستند معلومات پر اعتماد کرنا ضروری ہے۔ ان کے مطابق شدید گرمی میں جسم کو متوازن رکھنے کا سب سے مؤثر طریقہ مناسب مقدار میں پانی پینا اور ایسی غذائیں استعمال کرنا ہے جو قدرتی طور پر پانی اور معدنیات فراہم کرتی ہیں۔

انہوں نے بتایا کہ روزانہ تقریباً 8 سے 12 گلاس پانی پینا مفید ہے، جبکہ تربوز، خربوزہ، کھیرا اور دہی جیسی غذائیں جسم میں پانی کی کمی پوری کرنے میں مدد دیتی ہیں۔

سوڈا اور کولڈ ڈرنکس کے بارے میں بات کرتے ہوئے ان کا کہنا تھا کہ کبھی کبھار استعمال سے کوئی خاص مسئلہ پیدا نہیں ہوتا، لیکن اگر یہ مشروبات روزمرہ کا حصہ بن جائیں تو اضافی شکر اور غیر ضروری کیلوریز صحت پر منفی اثر ڈال سکتی ہیں۔

تربوز کھانے کے بعد پانی یا لسی پینے سے فوڈ پوائزننگ ہونے کا تصور بھی حقیقت پر مبنی نہیں۔ ماہر غذائیت کے مطابق خوراک سے پیدا ہونے والی بیماریوں کی بڑی وجوہات آلودہ پانی، غیر صاف پھل یا ناقص صفائی کے اصول ہوتے ہیں۔ تربوز چونکہ خود بھی پانی سے بھرپور پھل ہے، اس لیے اس کے بعد پانی پینا کسی نقصان کا سبب نہیں بنتا۔

اسی طرح کھیرا کھانے کے بعد پانی پینے سے متعلق خدشات کو بھی انہوں نے بے بنیاد قرار دیا۔ ان کے مطابق مسئلہ صرف اس وقت پیدا ہوسکتا ہے جب پانی یا خوراک صاف نہ ہو۔

کھانے کے بعد چائے پینے کے بارے میں ان کا کہنا تھا کہ محدود مقدار میں چائے نقصان دہ نہیں، تاہم ضرورت سے زیادہ استعمال جسم میں پانی کی کمی پیدا کرسکتا ہے۔

چینی کے استعمال پر گفتگو کرتے ہوئے انہوں نے اعتدال کی اہمیت پر زور دیا۔ ان کے مطابق مکمل پرہیز سے زیادہ ضروری یہ ہے کہ مقدار کو قابو میں رکھا جائے۔ بین الاقوامی صحتی سفارشات کے مطابق روزانہ تقریباً چھ چمچ چینی کافی سمجھی جاتی ہے، جبکہ بعض میٹھے مشروبات میں یہ مقدار ایک ہی گلاس میں موجود ہوتی ہے۔

مچھلی کے ساتھ دودھ پینے سے جلد کی بیماری پیدا ہونے کا مشہور تاثر بھی سائنسی بنیادوں سے محروم ہے۔ انہوں نے وضاحت کی کہ دنیا کے مختلف خطوں میں مچھلی کو دودھ یا دہی سے تیار کردہ مختلف ساسز کے ساتھ کھایا جاتا ہے اور اس سے کسی مخصوص بیماری کا تعلق ثابت نہیں ہوا۔

مزید یہ کہ گرم اور ٹھنڈی اشیاء ایک ساتھ کھانے سے نقصان ہونے کا خیال بھی درست نہیں۔ ان کے مطابق معدہ خوراک کو ہضم کرنے کے دوران اس کے درجہ حرارت کو معمول کے مطابق لے آتا ہے۔

کھانے کے فوراً بعد پانی پینے کے حوالے سے بھی کوئی مستند سائنسی ثبوت موجود نہیں جو اس عادت کو نقصان دہ ثابت کرے۔ پانی ضرورت کے مطابق کھانے سے پہلے، دورانِ کھانا یا بعد میں پیا جا سکتا ہے۔

ماہرین کے مطابق صحت مند زندگی کا راز غیر مصدقہ باتوں پر یقین کرنے کے بجائے متوازن غذا، صاف پانی، مناسب صفائی اور درست معلومات کو اپنانے میں ہے۔