غریب تھا بیوی کو کوئی اور مل گیا پھر.. ماں کے ساتھ وی لاگ بنانے والے علی سفیان کی زندگی کے چند حقائق

"میں غریب تھا. محبت کی شادی ہوئی تھی لیکن پھر معاملات بگڑ گئے. یوں سمجھیں کہ میرے پاس تم ہو ڈرامے کی طرح میری سابقہ اہلیہ کو بھی کوئی ہمایوں سعید مل گیا پھر بس اب دعا کرتا ہوں کہ وہ جہاں رہیں خوش رہیں"

مزاحیہ انداز میں زندگی کے تلخ حقائق بیان کرنے والے کوئی اور نہیں بلکہ علی سفیان واصف ہیں. علی سفیان اپنی والدہ کے ساتھ مختلف وی لاگز اور مزاحیہ ریلز بناتے ہیں جو نوجوانوں میں بہت زیادہ مقبول ہیں. حال ہی میں انھوں نے احمد علی بٹ کے پوڈکاسٹ میں شرکت کر کے اپنی نجی زندگی کے بارے میں گفتگو کی.

ایک سوال کے جواب میں ان کا کہنا تھا کہ وہ بی کام کر کے کینیڈا آگئے اور یہاں انھوں نے ڈبل شفٹوں میں کام کیا. چونکہ وہ اکلوتے بیٹے ہیں اس لئے ان کی والدہ بھی ساتھ رہتی ہیں. وہ پاکستان نہیں آتے کیوں کہ رشتے داروں کو شکوہ ہوتا ہے کہ ہمارے لیے کوئی خاص تحفہ نہیں لایا وہ یہ احساس نہیں کرتے کہ یہاں کی زندگی کتنی مشکل ہے اور ان پر کتنی ذمہ داری ہے.

علی سفیان نے یہ بھی بتایا کہ وہ دوسری شادی کی خواہش رکھتے ہیں اور بیرون ملک ہی شادی کریں گے.

اپنی والدہ سے دوستی کے بارے میں ان کا کہنا تھا کہ والد کے انتقال کے بعد جب وہ اور والدہ اکیلے رہ گئے تو ماں بیٹے سے زیادہ ان کا دوستی کا رشتہ بن گیا. اب ان کی ویڈیوز کے کیمرہ مین کے فرائض بھی ان کی بے بے یعنی والدہ انجام دیتی ہیں.