ایشوریا رائے کی ہیرے جڑی شیروانی کے چرچے۔۔ قیمت نے سب کے ہوش اڑا دیے

Aishwarya Diamond Studded Sherwani Price

ایشوریا رائے بچن نے پیرس فیشن ویک کے ریمپ پر قدم رکھتے ہی ایک بار پھر اپنی الگ پہچان ظاہر کر دی۔ بالی وڈ کی یہ اسٹائل آئیکون ہمیشہ کی طرح پُراعتماد انداز میں جلوہ گر ہوئیں اور منیش ملہوترا کے منفرد ڈیزائن کو پیش کر کے روایت اور جدت کا حسین امتزاج دکھایا۔

51 برس کی اداکارہ، جو ایک عالمی بیوٹی برانڈ کی نمائندہ بھی ہیں، کئی دہائیوں سے بین الاقوامی فیشن ایونٹس میں اپنی موجودگی سے توجہ کا مرکز بنتی رہی ہیں۔ اس بار انہوں نے نیلے رنگ کی ری امیجڈ شیروانی زیب تن کی جو اپنی ساخت اور باریکیوں کے باعث سب کی نظریں اپنی طرف کھینچنے میں کامیاب رہی۔

منیش ملہوترا کے مطابق اس لباس میں مردانہ ورثے کی جھلک کے ساتھ جدید کاریگری کو شامل کیا گیا ہے۔ لباس میں ہیرے کی جڑائی، منفرد بٹن، بلند کالر اور تراشیدہ سلوٹ نمایاں تھے جبکہ ساتھ میں فلیئرڈ پینٹس نے مکمل توازن فراہم کیا۔ اس طرح کے کسٹم ہائی فیشن ملبوسات، خاص کر جب وہ ہیرے اور جیولری ورک شامل ہوں، لاکھوں یا کروڑوں روپے کی لاگت رکھتے ہیں جبکہ ڈیزائنرز بھی فی گھنٹہ لاکھوں روپوں کا معاوضہ لیتے ہیں۔ ایک محتاط اندازے کے مطابق ایشوریا کے مجبوعی لباس کی لاگت تقریباً 5 کروڑ بھارتی روپے ہوسکتی ہے۔

ایشوریا نے اپنی لک کو ہیرے کے اسٹڈز، انگوٹھی اور ہائی ہیلز سے سادہ مگر پراثر بنایا۔ کھلے بالوں اور ہلکے رومانوی انداز نے پورے انداز کو مکمل کر دیا۔

ان کی تصاویر اور ویڈیوز سوشل میڈیا پر تیزی سے وائرل ہو رہی ہیں، اور مداح ایک بار پھر یاد دلا رہے ہیں کہ وقت گزرنے کے باوجود ان کی کشش اور انداز کم نہیں ہوا۔ تین دہائیوں بعد بھی وہ وہی اعتماد اور دلکشی کے ساتھ عالمی اسٹیج پر موجود ہیں۔