ان لوگوں کو خود سوچنا چاہیئے کہ ۔۔ احسن خان نے معاشی بحران سے پریشان ہوکر ملک چھوڑنے والوں کے بارے میں کیا کہا؟

احسن خان ایک پاکستانی اداکار، میزبان، اور ماڈل ہیں، جو شوبز کی دنیا کا ایک بڑا نام ہیں۔ ان کی پراعتماد اور کرشماتی شخصیت کو مداح پسند کرتے ہیں، اور ان کی باتوں کو کافی اہمیت دیتے ہیں۔

ان دنوں جو ملک میں معاشی بحران چل رہا ہے اس سے نچلے طبقے سے لے کر اونچے طبقے تک ہر کوئی ہی پریشان ہے، مہنگائی اتنی ہوگئی ہے کہ گھر کا خرچہ چلانا ایک عام آدمی کیلیئے مشکل ترین کام بن گیا ہے۔ ایسے میں نوجوان نسل میں ملک چھوڑ کر جانے کا رجحان کافی حد تک بڑھ گیا ہے اور ہر کوئی اسی کوشش میں لگا ہوا ہے کہ کیسے یہاں سے نکلا جائے۔

ایسے ہی نوجوانوں کو احسن خان نے ایک پیغام دیا ہے۔ دراصل احسن خان حال ہی میں ایک پوڈ کاسٹ میں بطور مہمان شریک ہوئے جہاں انہوں نے بگڑتی ہوئی معاشی اور سیاسی صورتحال کے بارے میں بات کی۔

احسن خان کا کہنا تھا کہ، جو لوگ ملکی معاشی حالات کے باعث تنگ دستی کا شکار ہیں یا مستقل ذریعہ معاش نہ ہونے کے باعث خودکشی کرنے پر مجبور ہیں، ایسے لوگوں کی ویڈیوز جب سوشل میڈیا پر سامنے آتی ہیں تو میرا دل بہت دکھتا ہے۔

انہوں نے ایسے حالات میں ملک چھوڑنے والوں کوکچھ عرصہ صبر کرنے کی تلقین کرتے ہوئے کہا کہ، ان حالات میں ملک صرف وہ چھوڑ کر جارہے ہیں جن کی آمدنی میں کچھ کمی آئی ہے نا کہ وہ جن کی آمدنی ختم ہوگئی ہے۔ ان لوگوں کو تھوڑا صبر کرنا اور سوچنا چاہیئے کہ جب تمام پڑھے لکھے لوگ ملک چھوڑ کر چلے جائیں گے تو سسٹم کون سنبھالے گا، وہ کس کے ہاتھوں میں ملک چھوڑ کر جا رہے ہیں۔