Sagodana Kheer Recipe in Urdu

اجزاء:
ساگودانہ بچوں کی پسندیدہ اور مفید غذا ہے اس کو بچوں کی ٹھوس غذا بھی کہا جاسکتا ہے لیکن کچھ لوگوں کو اس میں موجود ببل جیسے دانے برے لگتے ہیں، اور کچھ کو اس کا ذائقہ نہیں بھاتا۔ لیکن یہ غذائیت کے اعتبار سے فائدہ مند غذا ہے اور اس میں خاص طور پر کیلشئیم کی وافر مقدار موجود ہے۔ اس کو کھانے سے ہڈیاں مضبوط ہوتی ہیں، شدید اسہال یا ڈائریا میں اس کے کھانے سے فوراً افاقہ ہوتا ہے اور دست رک جاتے ہیں۔ بچوں کو موٹا اور صحت مند بناتا ہے۔ اس کے ساتھ ساتھ اس میں موجود میگنیشئیم اور کیلشئیم جسم کو ٹھوس اور مضبوط بناتا ہے۔ یہاں ہم ساگودانے سے بہت مزیدار کھیر بنا رہے ہیں جو وہ لو گ بھی شوق سے کھائیں گے جن کو ساگودانہ پسند نہیں۔ تو آئیے کھیر بناتے ہیں۔
ساگودانہ ۔۔۔ ایک کپ
خشک دودھ ۔۔۔ ایک چوتھائی کپ
دودھ ۔۔۔۔۔5 کپ
چینی ۔۔۔ آدھا کپ
حسبِ منشا میوہ جات
الائچی پاؤڈر۔۔ ایک چوتھائی چائے کا چمچ
زعفران ۔۔ اگر ہو تو ایک چٹکی نہ ہو تو ضروری نہیں

ایک پیالے میں یاک کپ ساگودانہ ایک گھنٹے کے لئے بھگو دیں۔ اب ایک پین میں ایک چمچ گھی میں تمام میووں کو ہلکا سا فرائی کر کے الگ رکھ لیں۔ اب اسی پین میں ساگودانہ ڈال کر ایک منٹ تک بغیر کسی تیل کے بھون لیں۔ اب اس میں خشک دودھ ڈال کر ذرا سا چلائیں۔ اب اس میں دودھ ڈال کر پکنے کے لئے رکھ دیں ، آنچ درمیانی رکھیں۔ اب جب دودھ کی مقدار پکتے پکتے کم ہوجائے تو اس میں چینی ڈال دیں اور پکنے دیں۔ جب اور گاڑھا ہوجائے تو اس میں تمام فرائی کیے ہوئے میوے ڈال دیں۔ اگر زعفران ہو تو ایک چٹکی ڈال دیں ورنہ چند قطرے کیوڑا ٹپکادیں۔ اس کے بعد اس میں الائچی پاؤڈر ڈال دیں۔ جب مرضی کے مطابق کھیر گاڑھی ہوجائے تو اتار لیں اور ڈش میں نکال کر ٹھنڈا ہونے کے لئے رکھ دیں۔ اوپر سے خشک میوہ جات سے سجادیں۔ لیجیے آپ کی لذیذ اور فائدہ مند ساگودانہ کھیر تیار ہے۔ خود بھی کھائیں مہمانوں کو بھی پیش کریں۔