جوان بیٹے کی موت کا صدمہ بہت بڑا ہے.. ریما خان کی مولانا طارق جمیل سے تعزیت! تصویر کے ساتھ پیغام بھی شئیر کردیا

"میں مولانا طارق جمیل سے ان کے بیٹے کی تعزیت کے لئے ملنے گئی. اس ملاقات میں مولانا صاحب اور ان کے گھر والوں نے مجھے سبق دیا کہ انسان کو ہر حال میں اللّٰہ تعالیٰ کے سامنے سر جھکانا چاہیے اور اللّٰہ تعالیٰ کی مرضی پر راضی رہنا چاہیے۔ اگرچہ جوان بیٹے کی موت بہت بڑا سانحہ ہے لیکن مولانا صبر کرنے والوں میں سے ہیں"

یہ کہنا ہے ملک کی نامور سینیر اداکارہ ریما خان کا جنھوں نے حال ہی میں انسٹاگرام اکاؤنٹ پر معروف مذہبی اسکالر مولانا طارق جمیل کے ساتھ ایک تصویر شئیر کی اور ساتھ میں دل چھو لینے والا پیغام بھی تحریر کیا.

ریما خان نے لکھا کہ میں نے مولانا صاحب اور ان کے خاندان کے قول و فعل میں مکمل توازن دیکھا. وہ ناصرف زبان سے دین کا سبق دیتے ہیں بلکہ عملی طور پر اسلام سے وفاداری کا ثبوت دیتے ہیں۔ دعا ہے کہ اللّٰہ تعالیٰ ان کو اور ان کے خاندان کو یہ بڑا صدمہ برداشت کرنے کی ہمت عطاء فرمائے"

واضح رہے کہ 29 اکتوبر کو مولانا طارق جمیل کے سب سے چھوٹے بیٹے عاصم جمیل نے خود کو سینے پر گولی مار کر خودکشی کر لی تھی جبکہ ریما خان اس سے قبل بھی دینی رہنمائی حاصل کرنے کے لئے مولانا طارق جمیل سے ملاقات کرچکی ہیں.