ایسی سادی شادی اللّٰہ سب کو نصیب کرے ۔۔ ماہرہ خان کی شادی کو سادگی کا نام دینے والے فنکاروں کو سوشل میڈیا صارفین نے آڑے ہاتھوں لے لیا

یکم اکتوبر کو پاکستان کی خوبصورت اداکار ماہرہ خان، کامیاب بزنس مین سلیم کریم کے ساتھ شادی کے بندھن میں بندھ گئیں جو پی سی بھوربن میں منعقد ہوئی۔ ماہرہ خان کی شاندار شادی آج بھی اپنی شان و شوکت کی وجہ سے سرخیوں میں ہے۔ اداکارہ نے بھوربن میں پرل کانٹی نینٹل ہوٹل کے 200 کمرے چھ روزہ جشن کے لیے اپنے چاہنے والوں کے لیے مخصوص کیے جو شادی میں شریک تھے۔

پہلے تو ایسا لگا کہ شادی بہت سادگی سے ہوئی جس میں کوئی رقص، شور اور غیر ضروری تقریب نہیں ہوئی۔ ماہرہ خان کے منیجر نے شادی کے اختتام پر ایک چھوٹی سی جھلک شیئر کی جس نے سب کو ان کی مرکزی تقریب کے بارے میں بصیرت فراہم کی۔

نتاشا حسین، نازش جہانگیر اور کین ڈول (عدنان ظفر) سمیت کئی پاکستانی مشہور شخصیات نے ماہرہ خان کی شاندار شادی کی تعریف کی۔ انہوں نے سادگی سے شادی کرنے پر ان کی تعریف بھی کی۔

تاہم مسلسل نت نئے فنکشنز کی تصاویر اور ویڈیوز سامنے آنے کے بعد سوشل میڈیا صارفین کو دلچسپ تبصرے پیش کرنے کا موقع مل گیا، جو سوشل میڈیا صارفین پہلے اداکارہ کی سادی شادی پر ان کی تعریفیں کر رہے تھے اب اس کے نہ ختم ہونے والے سلسلے پر کہہ رہے ہیں کہ، 'کہنے کو یہ سادہ شادی ہے اور فنکشنز 11 ہیں۔' ایک صارف کا کہنا تھا 'اللّٰہ اتنی سادہ شادی سب کو نصیب کرے'۔ ایک نے کہا، 'جتنے کا ان کا لہنگا اور میک اپ ہے اتنے میں کسی کی شادی ہوسکتی ہے'۔ کچھ کا کہنا تھا، 'ماہرہ نے پہلے سادہ تصویریں ڈال کر توجہ حاصل کرلی اب آہستہ آہستہ کھل رہی ہیں۔'